Gobernu Kontseiluak baimena eman du, gaur, Errioxako Nazioarteko Unibertsitatearekin (UNIR) hitzarmena sinatzeko, hezkuntza-arloko lankidetza bat ezartzeko, ikasleei prestakuntza integrala, teorikoa eta praktikoa eskaintzeko eta, horrela, etorkizuneko enplegagarritasuna eta lan-merkatuan sartzeko gaitasuna hobetzeko prestakuntza profesionala bermatzeko.
Akordioari esker, unibertsitateko ikasleek Ertzaintzaren bulegoetan egin ahal izango dute praktiketako prestakuntza, haien aholkularitzapean eta laguntzarekin, eta praktika horiek hartzeko eta tutorizatzeko programa bati jarraituz.
Praktika horien helburua ikasleen prestakuntza integralean laguntzea da, ikaskuntza teorikoa eta praktikoa osatuz.
Kontraprestazio ekonomikorik ez duen lankidetza horren bidez, ikasleen prestakuntza praktikoa hobetu nahi da, lantokien benetako egoeretara egokituz, kolektibo horrek lan-errealitatearekin eta egungo arazoekin harreman zuzena izan dezan sustatuz, eta hori titulazioa jasotzen duten ikasleen lanbide-kualifikazio hobean islatuko da.
Hitzarmen honek, aldeentzako harreman beharrezko eta aberasgarria bultzatzeaz gain, etorkizunean Ertzaintzak arlo horietan dituen prozeduretan eta eraginkortasunean eragina izan dezaketen azterlanak egitea ahalbidetuko du.
Urteak dira Segurtasun Sailak lankidetzan diharduela Euskadiko zein Estatuko unibertsitateekin. Hitzarmenak 4 urteko indarraldia izango du, eta beste 4 urtera luzatu ahal izango da.
