- Eusko Jaurlaritzako Osasun Sailari atxikitako Osasun Ikerketa Institutua da 3D inprimaketaren bidez neurrira egindako osasun-produktuak diseinatzeko eta fabrikatzeko baimena duen Euskal sare publikoko lehen zentroa
- Teknologia horri esker, paziente bakoitzaren ezaugarri eta beharretara egokitutako modelo anatomikoak, kirurgiarako gidak, erradioterapiarako maskarak eta aldi baterako protesiak sor daitezke
- Fabrikazio pertsonalizatuak lantalde profesionalei laguntzen die tratamendu eta esku-hartze jakin batzuk hobeto planifikatzen, zehaztasun eta segurtasun handiagoz, eta berrikuntza teknologikoa Osakidetzako asistentzia-praktikara eramaten
- Ekimen honek aurrera egiten du Euskadiko Osasun Itunaren helburuetan, hau da, arreta pertsonalizatuagoa, hurbilagoa eta berritzaileagoa sustatzea, pazienteen beharrei hobeto erantzungo diena
Biobizkaia Osasun Ikerketa Institutuak, Osasun Sailari atxikita dagoenak, Eusko Jaurlaritzaren lizentzia ofiziala lortu du neurrirako osasun-produktuen fabrikatzaile gisa, eta ziurtagiri hori lortu duen euskal sare publikoko lehen agentea bihurtu da. Mugarri horrek hamarkada bat baino gehiagoko ibilbidea indartzen du praktika klinikoari aplikatutako 3D inprimaketari lotutako berrikuntzan eta garapenetan.
Lizentzia berriari esker, osasun-produktuen bost familia pertsonalizatu diseina eta fabrika daitezke: bioeredu anatomikoak, bioeredu anatomiko esterilizagarriak, gida kirurgikoak, azaleko erradioterapia aplikatzeko maskarak eta epitesi iragankorrak, guztiak ere paziente bakoitzaren behar espezifikoetara egokituak.
3D inprimaketaren bidez osasun-produktu pertsonalizatuak fabrikatzeko Biobizkaiak lortu duen baimenak indartu egiten du Eusko Jaurlaritzako Osasun Sailaren konpromisoa, osasun-arreta hurbilagoa, zehatzagoa eta paziente bakoitzaren beharretara egokituagoa izan dadin. Ekimen horrek, Euskadiko Osasun Itunarekin bat eginda, berrikuntza eta Osakidetzan teknologia berriak modu seguruan sartzea sustatzen ditu, hainbat diziplinatako profesionalen arteko lankidetza bultzatzen du eta tratamenduen eta interbentzioen planifikazioa hobetzen laguntzen du. Horrela, euskal sistema publikoak aurrera egiten du arreta pertsonalizatuagoa, bidezkoagoa eta pertsonetan oinarrituagoa lortzeko bidean.
Integrazio klinikoa: irudi medikotik ebakuntza-gelara
Biobizkaiaren ereduaren bereizgarrietako bat Erradiologia arloarekin duen lankidetza estua da, arlo hori funtsezko zutabetzat jotzen baita prozesuan. 2016az geroztik, Osakidetzako Ezkerraldea-Enkarterri Gurutzetako ESIak 3D inprimaketako prestakuntza-programak garatzen ditu atxikitako profesionalentzat eta egoiliarrentzat, eta 2024az geroztik, Osakidetzako Bilbo-Basurtuko ESIak ere bat egin du diziplina anitzeko ikuspegi horrekin.
Irudi mediko aurreratuetatik abiatuta (OTA eta erresonantzia magnetikoa), segmentazio zehatza egiten da, pazientearen anatomiarekin bat datozen hiru dimentsioko ereduak sortzeko. Ondoren, ingeniaritza-taldeak irudi horiek egokitzen ditu 3D inprimaketan fabrikatzeko edo tresna osagarri pertsonalizatuak diseinatzeko.
Erradiologiaren, ingeniaritzaren eta espezialitate klinikoen arteko integrazio zuzen horrek prozedura konplexuetako ziurgabetasuna murrizten du, eta eragin zuzena izan dezake osasun-emaitzetan. Aurpegi-masailetako kirurgiak, traumatologiak, bihotz-hodietako kirurgiak, otorrinolaringologiak eta onkologia erradioterapikoak, besteak beste, teknologia hori erabiltzearen alde egin dute.
Osakidetzan aplikatutako arrakasta-kasuak
Kirurgia Kardiobaskularra
Roberto Voces Sánchez Ezkerraldea Enkarterri Gurutzetako ESIko Kirurgia Kardiobaskularreko Zerbitzuko buruak 3Dn inprimatutako eredu anatomikoak erabiltzen ditu bihotzeko kirurgia konplexuak prestatzeko. Paziente bakoitzaren bihotzaren erreplika horiek aukera ematen diote talde medikoari interbentzioa zehaztasun handiagoz planifikatzeko, tratatu beharreko zonak aurreratzeko eta prozedura hobeto azaltzeko. Teknika hori erabiltzeak kirurgia pertsonalizatuagoa, seguruagoa eta konplikazio gutxiagokoa izaten laguntzen du.
Aurpegi-masailetako kirurgia
Leyre Margallo Itza Ezkerraldea-Enkarterri Gurutzetako ESIko Aurpegi-masailetako Kirurgiako Zerbitzuko mediku laguntzaileak 3Dn inprimatutako eredu eta gida kirurgikoak erabiltzen ditu hausturengatiko, malformazioengatiko edo inplanteak jartzeagatiko ebakuntzak prestatzeko. Tresna horiek, paziente bakoitzaren anatomiari egokituak, ebakiak egiten eta protesiak zehaztasun handiagoz jartzen laguntzen dute. Horrela, kirurgiaren eta anestesiaren denbora murrizten da, eta errekuperazio azkarragoa eta seguruagoa ahalbidetzen da.
Onkologia erradioterapikoa
Olga del Hoyo Álvarez Ezkerraldea-Enkarterri Gurutzetako ESIko Onkologia Erradioterapikoko Zerbitzuko mediku adjuntuak 3Dko inprimaketarekin fabrikatutako molde pertsonalizatuak erabiltzen ditu azaleko minbizi jakin batzuk tratatzeko. Moldeok eremu irregular eta sentikorretara egokitzen dira, hala nola sudurrera, betazaletara, ezpainetara edo belarrietara, eta erradioterapia zehaztasun handiagoz aplikatzea ahalbidetzen dute, ehun osasuntsuak babestuz. Horrela, tratamendua erosoagoa eta laburragoa da, batez ere pertsona heldu edo hauskorrentzat, eta bizi-kalitatea eta emaitza estetikoa hobetu ditzake.
Gizartean duen eragina
Lizentzia honekin medikuntza pertsonalizatua bultzatzen da Osakidetzan, pazienteei aplikatzeko 3D ereduen garapena zabalduz. Hala, Eusko Jaurlaritzak ikerketaren transferentzia bultzatzen du laborategitik pazientera, eta atea irekitzen die aplikazio kliniko eta ikerketa lerro berriei fabrikazio pertsonalizatuan. Plataforma erreferente autonomiko eta estatala da, eta ahalmena du osasun-berrikuntzako sareetan eta zentro anitzeko proiektuetan lankidetzan aritzeko.
