- Deialdia Itsasoko, Arrantzako eta Akuikulturako Europako Funtsak (FEMPA) %70ean finantzatuko du, eta enpresa-inbertsioak, enplegua sortzea eta ekonomia urdinarekin lotutako interes kolektiboko proiektuak babestuko ditu.
- Laguntzak Euskadiko arrantza-itsasertzeko enpresei, profesionalei, kofradiei, elkarteei eta beste eragile batzuei zuzenduta daude, Itsas Garapen Elkarteak kudeatzen duen Tokiko Garapen Parte-hartzailearen Estrategiaren bidez.
Eusko Jaurlaritzak 2,1 milioi euro bideratuko ditu 2026an eta 2027an Euskadiko arrantza-eremuen garapen jasangarrira bideratutako proiektuak babesteko, Tokiko Garapen Parte-hartzailearen Estrategiaren (TGPE) eta Itsasoko, Arrantzako eta Akuikulturako Europako Funtsaren (FEMPA) esparruan.
Deialdiaren helburua arrantza-komunitateen dibertsifikazio ekonomikoa sustatzea, enplegua sortzea bultzatzea eta ekonomia urdinarekin lotutako jarduera berriak sustatzea, eta, aldi berean, itsas eta arrantza-ondarea eta tokiko garapena indartzea da. Laguntzak Arrantza Sektoreko Tokiko Ekintza Taldearekin (GALP), Itsas Garapen Elkartearekin, lankidetzan kudeatuko dira. Elkarte horrek estrategiaren aplikazioa bere lurralde-eremuan garatzeaz arduratzen da.
Aurrekontu osotik, 1,47 milioi euro FEMPA funtsari dagozkio, eta 630.000 euro Euskadiko Aurrekontu Orokorrei. Zenbateko horren barruan, 1,85 milioi euro ekoizpen-inbertsioetarako izango dira, 20.000 euro enplegua sortzeko eta 230.000 euro ekoizpenik gabeko inbertsioetarako. Guztizko zuzkiduratik, 100.000 euro 2026ko ekitaldirako izango dira eta 2 milioi euro 2027rako.
Ekoizpen-inbertsioek enpresa berriak eta arrantza-sektorearen dibertsifikazioarekin lotutako negozio-ildo berriak sortu eta abian jartzea babesteko aukera emango dute, baita arrantzako udalerrietan ekonomia urdinarekin lotutako jarduerak ere. Laguntza horiek mikroenpresek, enpresa txiki eta ertainek eta enpresa izaera hartuko duten pertsona fisikoek jaso ahal izango dituzte.
Deialdiak enplegua sortzeko berariazko ildo bat ere jasotzen du. Ildo horren bidez, kontratazio berriak zein autoenplegua sustatzea eta gizarte-ekonomiako enpresetan sartzea bultzatuko dira, betiere jarduerak arrantza-sektorearen dibertsifikazioarekin edo ekonomia urdinarekin lotuta badaude.
Bestalde, ekoizpenik gabeko inbertsioek interes kolektiboko proiektuak babesteko aukera emango dute, hala nola arrain-kontsumoa sustatzeko kanpainak, itsas eta arrantza-ondarea eta arrantza-arteak ezagutarazteko jarduerak, ingurumen-azterketak, energia-eraginkortasuneko eta klima-aldaketara egokitzeko ekimenak, trantsizio digitala, ura aurreztea eta berrerabiltzea edo sektoreko higiene, osasun eta segurtasun-baldintzak hobetzea.
Laguntzen onuradun izan daitezke arrantzaleen kofradiak eta haien federazioak, lanbide-elkarteak, ekoizleen erakundeak eta arrantzaren esparruarekin lotutako beste erakunde batzuk, baita jarduera nautikoekin, arrantzako produktuen sustapenarekin, itsas eta kostaldeko ingurumenarekin, itsas eta arrantza-ondarearekin, prestakuntzarekin, turismo urdinarekin edo ekonomia urdinarekin lotutako proiektuak garatzen dituzten enpresak eta beste eragile batzuk ere.
Estrategiaren aplikazio-eremuak honako udalerri hauek hartzen ditu: Bermeo, Mundaka, Ondarroa, Getaria, Mutriku, Berriatua, Elantxobe, Orio, Hondarribia, Pasaia, Zumaia, Lekeitio, Lemoiz, Zierbena, Santurtzi eta Plentzia, baita Donostiako arrantza-portua ere.
Deialdi honen bidez, Eusko Jaurlaritzak arrantza-komunitateen tokiko garapena indartuko du, jarduera ekonomiko berriak eta enplegua sortzea babestuz eta euskal itsasertzeko ingurumen, kultura eta itsas baliabideak balioan jarriz.
