Sailburuak iragarri du hitzarmen bat sinatuko dela Espainiako Erregistratzaileen Elkargoarekin, etxebizitza turistikoen ikuskapena indartzeko balioko duena.
Eusko Jaurlaritzako Turismo, Merkataritza eta Kontsumo sailburu Javier Hurtadok Eusko Legebiltzarrean hitz egin du gaur, EH Bildu taldeak Jaurlaritzak erabilera turistikoko etxebizitzen kontrolaren arloan hartutako neurriei buruz egindako interpelazioari erantzunez. Hartutako neurriak berrikusteaz gain, Espainiako Erregistratzaileen Elkargoarekin hitzarmena sinatuko duela eta Euskadiko bizilagunen erkidegoetako presidenteei informazio-gutunak bidaliko dizkiela iragarri du.
Ildo horretan, sailburuak azpimarratu egin ditu Iraupen Laburreko Alokairuen Europako Erregelamendu berriari eta Leihatila Digital Bakarrari esker (uztailaren 1etik dago indarrean) lortutako aurrerapenak. «Espainia izan da aplikatu duen lehen herrialdea, eta Euskadi protagonista izan da bere garapenean. Europako Parlamentuak komunitate proaktiboenetako bat bezala onartu gintuen «, gogorarazi du. Tresna berri horiei esker, Eusko Jaurlaritzak araudia betetzen ez zuten 500 etxebizitza erregistro inguru baliogabetzea eta Kontsumobideren bidez legez kanpoko 700 iragarki baino gehiago kentzea lortu du.
Sailburuak, gainera, iragarri du hitzarmen bat sinatuko duela Espainiako Erregistratzaileen Elkargoarekin, eta hitzarmen hori hurrengo Gobernu Kontseiluan onartuko dela. Akordio horri esker, katastroko eta erregistroko informazio zehatza eskuratu ahal izango da, hala nola helbidea, geolokalizazioa edo higiezinen titulartasuna, eta horrek jauzi kualitatiboa ekarriko du ikuskapen- eta zehapen-lanetan. «Hitzarmen honek funtsezko datuak emango dizkigu etxebizitza klandestinoen kontrola hobetzen jarraitzeko eta gure jardueretan segurtasun juridikoa indartzeko», adierazi du.
Sailburuak gogora ekarri du, halaber, Etxebizitza, Lurzoru eta Hirigintza Arloko Premiazko Neurriei buruzko Legean Etxebizitza Sailarekin eta Legebiltzarreko taldeekin izandako lankidetza. Lege horretan, tentsioan dauden eremuetan etxebizitza turistiko berriak egiteko debekua jasoko da, bai eta 1/2025 Lege Organikoaren aplikazioa ere, jabeen erkidegoaren aldez aurreko baimena eskatzen baitu jarduerari ekiteko.
Sailburuak azpimarratu duenez, nahiz eta etxebizitza turistikoak Euskadiko bizitegi-parke osoaren % 0,5 baino ez izan, hartutako neurriei esker hazkundea eten eta eraikinen bizitegi-erabilera mantendu ahal izan da.
Ondorioz, sailburuak berretsi du Eusko Jaurlaritzak turismo-eredu iraunkor, etiko, lehiakor eta kalitatezkoa izateko konpromisoa duela, administrazioen arteko lankidetzan eta turismoaren eta egoitza-bizitzaren arteko orekaren babesean oinarritua. «Turismo arduratsua eta Euskadiko turismo-jardueraren eta etxebizitza-eskubidearen arteko oreka justua bermatzeko beharrezkoak diren neurri guztiak hartzen jarraituko dugu», amaitu du.
