Osalanek eraikuntzari buruzko jardunaldi tekniko berria ospatu du gaur Bilboko Euskalduna Jauregian, sektore horretako lan-istripuak gutxitzeko helburuarekin.
Lourdes Íscar Osalaneko zuzendari nagusiak «Lan segurua eraikuntzaren sektorean» izeneko jardunaldi teknikoa inauguratu du, eraikuntza-sektorean lanak modu seguruan egiteko gomendioak eta tresnak emateko, arrisku garrantzitsuenetako bati helduz, hala nola altueran erortzea, trenbide-gainegiturak berritzeko eta mantentzeko jarduerak eta prebentzio-baliabidearen figuraren ikerketa.
Topaketari hasiera emateko, Javier Rivera Pinto Osalaneko estatistika-teknikariaren eta Ibon Izagirre Suso Osalaneko LAPeko teknikariaren hitzaldia izan da. «Altueran erortzeagatiko arriskuaren prebentzioa: istripu-tasaren analisia, gabezia nagusiak eta prebentzio-gomendioak» izenburupean, eraikuntzaren sektorean altueran erortzeko arriskuari heldu diote, istripu-tasaren azterketa zehatza eginez, prebentzioaren kudeaketan dauden gabezia nagusiak identifikatuz eta segurtasuna hobetzeko gomendio praktikoak eskainiz.
Jarraian, trenbideen arloko eta laneko arriskuen prebentzioko adituek trenbide-gainegiturak berritzeko eta mantentzeko lanetako segurtasunari buruz eztabaidatu dute, Lorea Arrien Elgezabal Osalaneko LAP teknikariak moderatutako mahai-inguru batean, «Segurtasuna eta osasuna trenbide-gainegiturak berritzeko eta mantentzeko lanetan» izenburupean. Horrez gain, Trenbide-gainegiturak eraikitzean sortzen diren lan-arriskuak prebenitzeko gidaren bigarren zatia aurkeztu dute, oraingo honetan mantentze- eta berritze-lanetan oinarritua.
Kafe-etenaldi baten ondoren, «Prebentzio-baliabidearen eta beste lan-zaintza batzuen eskuliburu» berria aurkeztu da, CANO Taldea osatzen duten Galizia, Asturias, Kantabria eta Euskadiko lan-segurtasuneko institutuetako ordezkarien parte-hartzearekin. Moderatzailea Victoria Álvarez Cid izan da, Osalaneko eraikuntza sektoreko Gipuzkoako arduraduna. Jardunaldian, duela gutxi hildako Osalaneko lankideari errekonozimendu publikoa egin zaio.
Topaketa honek indartu egiten du Osalanen eta erakunde laguntzaileen laneko segurtasuna etengabe hobetzeko konpromisoa, arrisku handiko sektoreetan, hala nola eraikuntzan eta trenbideen mantentze-lanetan. Osalaneko zuzendari nagusiak adierazi duenez, «aro digitalean prebentzioan aurrera egiten jarraitzen dugu, baina ez ditugu alde batera uzten duela urte batzuetako arrazoi berberek eragindako istripuak. Hori dela eta, eraikuntza-sektorerako gaurkoa bezalako foroak sortzen jarraituko dugu, istripu berberak ez errepikatzeko prebentzio-neurriak bete daitezen «.
