Gaurko Gobernu Kontseiluak Euskal Autonomia Erkidegoko 2026ko ekitaldirako Aurrekontu Orokorren Proiektua onartu du. Proiektua 16.378 milioi eurokoa da, iaz baino % 4,1 handiagoa. Noël d ‘Anjou Ogasun eta Finantzetako sailburuaren hitzetan, “aurrekontu-proiektu honek errealismoa eta anbizioa uztartzen dituzte, orainaren eta etorkizunaren ikuspegiarekin, gaur egungo pertsonen bizitza hobetzera bideratuta, etorkizuneko Euskadin inbertitzea ahaztu gabe”.
Partida aipagarrienen artean daude Osasuna (5.327 M €) eta Hezkuntza (3.346 M €), guztizkoaren % 53, funtsezko zerbitzu publikoen indartzea sendotzeko. Era berean, Etxebizitza (482 M €) eta Segurtasuna (849 M €) dira hazkunde handienak izan dituzten eremuak ( % 6,8 eta % 6,4, hurrenez hurren), herritarren arazo errealetan jartzen baitute arreta. Nabarmentzekoa da, halaber, «Euskadi Eraldatuz 2030» proiektua, Inbertsio Eraldatzaileen Plana, Euskal Finantza Aliantzaren ibilbide-orria dena, 935 milioi euroko inbertsioarekin.
LH duala eta lantokiko prestakuntza bultzatzea
Era berean, Gobernu Kontseiluak argi berdea eman die LH duala eta lantokiko prestakuntza sustatzen dituzten bi aginduri. Lehen aurrekontu-partida 750.000 eurokoa da 2025-2026 ikasturterako. Eusko Jaurlaritzako bozeramaile Maria Ubarretxenak azaldu duen bezala, laguntza-deialdi honen bidez, ikasleek ikas-ekinezko erregimenean egin nahi dituzte ikasketak, enpresako irakaskuntza- eta ikaskuntza-prozesuak konbinatuz. Honek, pertsonen lanbide-kualifikazio eta espezializazio hobea sustatzeko.
Bigarren partidak (850.000 euro) Lanbide Heziketako ikasleen enpresa-egonaldiak finantzatuko ditu. Lantokiko prestakuntzako modulua egiten duten Lanbide Heziketako ikasleak enpresan egoteko beken deialdia da. Egonaldiak ikasturte honetako irailetik martxora bitartean egingo dira.
Euskadiren nazioarteko presentzia indartzea euskal pilotaren bidez
Gobernu Kontseiluak onartutako beste puntu bat zuzeneko bi dirulaguntzak izan dira, guztira 650.000 eurokoak, euskal pilotaren bidez Euskadiren kanpo-proiekzioa indartzeko, Eusko Jaurlaritzaren Euskadi Globala nazioartekotze-estrategiaren barruan.
Alde batetik, 350.000 euroko zuzeneko dirulaguntza emango zaio Euskadiko Euskal Pilota Federazioari, Euskal Selekzioak 2025. urtean nazioarteko txapelketetan parte hartzeak dakartzan gastuak ordaintzeko. Bestalde, Gobernu Kontseiluak 300.000 euroko dirulaguntza onartu du Euskal Pilota Nazioarteko Txapelketen Antolatzaileak Elkartearentzat (AEPNTAE). Elkarteak Basque Pilota Nations League – 36 metroko proba antolatuko du, Bilboko Miribilla frontoian, datorren azaroan.
66.000 eurotik gorako dirulaguntza Bilboko Arte Ederren Museoa Fundazioari
Era berean, Gobernu Kontseiluak 66.667 euroko dirulaguntza zuzena onartu dio Bilboko Arte Ederren Museoa Fundazioari, Bilboko ikuspegia (anonimoa, c. 1696–1706) pintura erosteko.
Ubarretxenak azaldu duenez, “laguntza hori Eusko Jaurlaritzak Euskadiko ondare artistiko eta historikoa kontserbatzeko, ikertzeko eta zabaltzeko duen konpromisoaren parte da, eta Bilboko Arte Ederren Museoa Fundazioaren hiru erakunde sortzaileek — Bizkaiko Foru Aldundiak, Bilboko Udalak eta Eusko Jaurlaritzak berak — beren bilduma indartzeko eta herrialdeko kultura-erakunde nagusi gisa duten zeregina indartzeko elkarrekin egindako ahaleginari gehitzen zaio”.
Zirkuko artisten eta Arabako landa-eremuko herritarren arteko sorkuntza artistikoa
Gobernu Kontseiluak gaur onartu duen kulturarekin lotutako azken puntua Garaion Naturartea erakundeari 45.000 euroko zuzeneko dirulaguntza ematea izan da, «Hara!» proiektua garatzeko. Zirkuko artisten eta Arabako landa-eremuko herritarren arteko sorkuntza artistikorako ekimena da.
Laguntza honekin, Eusko Jaurlaritzak berretsi egiten du kultura gizarteari hurbiltzeko, artisten lana aitortzeko eta landa-inguruneko kultura-ehuna indartzeko apustua.
Eustaten eta INEren arteko lankidetza-hitzarmen berria
Onartu den azken puntua Eustat – Euskal Estatistika Erakundearen eta Estatistikako Institutu Nazionalak (INE) arteko lankidetza-hitzarmen berria izan da, Euskadiko Biztanleriaren eta Heriotzen Mugimendu Naturalaren estatistikak egiteko, heriotza kausaren arabera Akordio honek helburu du prozedura estatistikoak eguneratzea, izandako aurrerapen teknologikoak tarteko, eta, era horretan, jarraipena ematen zaio bi erakundeen artean 1996an hasitako lankidetzari.
«Euskadiren eta Estatuaren arteko koordinazioa zehazten du hitzarmenak, jaiotzei, ezkontzei eta heriotzei buruzko datuen bilketan eta tratamenduan, erregistro zibiletatik eta sanitarioetatik datorren informazioaren estaldura, kalitatea eta puntualtasuna bermatuz» azaldu du Ubarretxena sailburuak.
