Eusko Jaurlaritzako Turismo, Merkataritza eta Kontsumoko sailburu Javier Hurtadok “Turismoa eta lehia: merkatu digitalen erronka” jardunaldia inauguratu du Bilbon. Topaketa hori Lehiaren Euskal Agintaritzak, Deustuko Unibertsitateak eta EHUk antolatu dute, plataforma digitalek turismoaren esparruan planteatzen dituzten erronkak aztertzeko helburuarekin. Lehiaren Euskal Agintaritzako presidente Ainara Herce San Martín ere bertan izan da.
Jardunaldiak esparru akademikoko, erakunde-esparruko eta enpresa-esparruko adituak bildu ditu, merkatu-boterea, plataforma digitalen zeregina eta turismoaren sektoreko erregulazio-erronkak aztertzeko. Programan Europako Batzordeko eta ELGAko ordezkarien eta sektoreko hainbat eragileren esku-hartzeak izan dira, baita bizitoki-zerbitzu turistikoak eta arautzaileen zeregina ardatz izan dituen mahai-inguru bat ere.
Lehiaren Euskal Agintaritzako presidente Ainara Herce San Martinentzat, «sektoreak bizi duen dinamismoa berri ona da euskal ekonomiarentzat, baina egiturazko erronkak ere planteatzen ditu, batez ere tokiko ostatu- eta etxebizitza-merkatuetan. Lehiaren Euskal Agintaritzak modu eraikitzailean lagundu nahi izan du. Bai Turismoaren Legearen aurreproiektuari buruz egindako txostenean, bai erabilera turistikoko etxebizitzei buruzko azterlanean, azpimarratu dugu erregulazioak koherentea izan behar duela erregulazio ekonomiko onaren printzipioekin: premia, proportzionaltasuna, segurtasun juridikoa eta lehiaren distortsio minimoa «.
Esku-hartze publikoaren aukerari dagokionez, honako hau azpimarratu du: «helburu legitimoei erantzun diezaieke eta erantzun behar die – hala nola etxebizitza eskuratzea, bizikidetza edo hiri-antolamendua –, baina merkatu-itxierak, justifikaziorik gabeko murrizketak edo ezinbestekoa denetik harago lehia mugatzen duten oztopoak saihestuz egin behar du. LEA/AVCk turismo ireki, berritzaile eta lehiakorrarekin dugun konpromisoa berresten dugu, Europako balioekin eta Euskadiko errealitate sozial eta ekonomikoarekin lerrokatuta».
Eskaini duen hitzaldian, sailburuak sektoreko araudiaren eta lehiaren zuzenbidearen arteko oreka aurkitzeko beharra defendatu du, eta, azpimarratu duenez, “erregulaziorik gabe ez dago ez askatasunik, ez benetako lehiarik». Ildo horretan, nabarmendu du arauak ezinbestekoak direla herritarrak babesteko, enpresa-jarduera bermatzeko eta merkatuaren funtzionamendu orekatua ziurtatzeko. Sailburuaren hitzaldiaren ardatz nagusietako bat plataforma digitalek erabilera turistikoko etxebizitzen esparruan duten inpaktua izan da, Euskadi ere eraginpean hartzen duen fenomeno globala. Fenomeno horrek etxebizitza-parke osoan pisu txikia badu ere (% 0,4 inguru), nabarmendu du garrantzitsua dela haren ondorioei aurrea hartzea eta erregulaziorik ezaren ondoriozko arazoak saihestea.
Euskadi aitzindaria izan zen esparru horretan, 2018an erabilera turistikoko etxebizitzei eta logelei buruzko dekretua onartu zenean. Dekretu horretan, erabiltzaileak zein auzotarrak babesteko neurriak sartu ziren, eta bidezko lehia bermatu zen. Hala ere, araudia betearazteko zailtasunak agertu direla aitortu da, bereziki plataforma digitalen laguntzarik ezari eta haiek zigortzeko muga juridikoei lotutakoak.
Testuinguru horretan, aurrerapauso handia izan da 2024an onartutako iraupen laburreko alokairuen Europako Erregelamendua, plataformen eta administrazioen arteko informazio-trukea eta gardentasuna hobetzeko aukera ematen duena. Euskadik aktiboki lagundu du erregelamendu horretan.
Ekitaldian, Eusko Jaurlaritzak arlo horretan garatutako jarduera-ildo nagusiak ere aipatu dira, hala nola arau-garapena Turismoaren Lege berri baten bidez. Lege horren aurreproiektua aurkeztu da dagoeneko.
