- Gobernu Kontseiluak hitzarmen bat onartu du EHUrekin, FutureFoodS Europako proiektuaren testuinguruan.
- Ekimenak elikadura-sistema jasangarriago, osasungarriago eta erresilienteagoen aldeko apustua indartzen du
Gobernu Kontseiluak Eusko Jaurlaritzako Elikadura, Landa Garapen, Nekazaritza eta Arrantza Sailaren eta Euskal Herriko Unibertsitatearen (EHU) arteko lankidetza-hitzarmena sinatzea onartu du, SpeedyFermHub Europako proiektua garatzeko. Proiektu hori jatorri begetaleko elikagai hartzitu berrien ikerketa eta garapenean oinarritzen da.
Proiektua FutureFoodS Europako partzuergoaren lehen deialdian kokatzen da. Ekimen estrategiko horrek 29 herrialdetako 84 erakunde biltzen ditu, eta datozen hamar urteetan ia 525 milioi euro mobilizatuko ditu elikadura-sistemak eredu jasangarriago, seguruago eta erresilienteagoetara eraldatzeko.
Hitzarmenak hartziduran eta lehengai begetaletan oinarritutako elikagai berritzaileen karakterizazioan, optimizazioan eta eskalatzean aurrera egiteko aukera emango du, eta, horrela, egungo elikadura-sistemaren erronkei erantzuten lagunduko du, hala nola jasangarritasunari, osasunari edo elikadura-segurtasunari. Halaber, proiektuak ezagutza zientifikoaren transferentzia azkartzea du helburu, elikagaien industriako aplikazio praktikoetara bideratuta.
Akordio honen bidez, Elikadura, Landa Garapen, Nekazaritza eta Arrantza Sailak 100.000 euro bideratuko ditu proiektua gauzatzeko, eta EHUk bere lan-programaren arabera garatuko du. Prozesu horretan, Elika Fundazioak, Sailari atxikitako erakundea eta elikadura-segurtasunaren eta berrikuntzaren arloko erreferentea den heinean, ekimenaren jarraipenean eta laguntza teknikoan parte hartuko du.
Lankidetza honek unibertsitatearen rola indartzen du ezagutzaren sorreran eta haren aplikazioan garapen ekonomiko eta sozialerako funtsezko eragile gisa, eta, aldi berean, euskal ekosistemaren gaitasuna sendotzen du ikerketa elikagaien balio-katera eramateko.
Proiektua bat dator Europako lehentasunekin elikagaien berrikuntzaren arloan, eta besteak beste honako alderdi hauek lantzen ditu: produktu berrien sustapena, elikagaien balio-katearen hobekuntza eta ekoizpen-sistemak klima- eta jasangarritasun-erronketara egokitzea.
Gainera, FutureFoodSen parte hartzeak Euskadi nazioarteko ikerketa eta berrikuntza-sareetan kokatzen du, beste eragile europear batzuekin lankidetza erraztuz eta elikadura aurreratuaren arloan duen posizionamendua indartuz.
Hitzarmenak 2029ko martxora arteko indarraldia izango du, eta jarraipen-batzorde bat izango du helburuen betetzea gainbegiratzeko, emaitzak aztertzeko eta garapenean zehar hobekuntzak proposatzeko.
Ekimen honekin, Eusko Jaurlaritzak elikadura-sektoreko berrikuntzarekiko konpromisoa indartzen du, gizartearen beharretara egokitutako sistema eraginkorrago, jasangarriago eta efizienteago bat eraikitzen laguntzen duten proiektuak babestuz.
