- Gobernu Kontseiluak Araba, Bizkaia eta Gipuzkoako foru-aldundiekin hitzarmenak sinatzea baimendu du.
- Akordioek komunikazio-sistemak eta ahots- eta datu-transmisiorako sistemak integratzen aurrera egiteko aukera emango dute, larrialdien eta gorabeheren aurreko erantzuna hobetzeko.
Gobernu Kontseiluak Segurtasun Sailaren eta Araba, Bizkaia eta Gipuzkoako foru-aldundien arteko hiru lankidetza-hitzarmen berri sinatzea baimendu du larrialdien kudeaketaren arloan, zehazki, ahotsaren eta datuen transmisiorako azpiegituren esparruan.
Akordio horien helburua da SOS Deiak-en, aginte- eta kontrol-zentroen eta larrialdien, suteen prebentzio eta itzalketaren eta salbamenduaren arloan eskumena duten foru-zerbitzuen arteko lankidetza eta koordinazioa indartzea.
Hitzarmenek administrazio sinatzaileak Eusko Jaurlaritzak kudeatzen duen TETRA irrati mugikorreko sare digitalean —ENBOR SAREA— integratzea antolatzen dute, eta ahotsa eta datuak informazio- eta komunikazio-sistemen bidez trukatzea errazteko mekanismoak aurreikusten dituzte. Horrela, baliabideak mobilizatzea eskatzen duten larrialdien eta gorabeheren aurrean erantzun eraginkorragoa eta koordinatuagoa ematea errazten da.
TETRA ENBOR SAREA komunikazio-azpiegitura seguru eta eraginkorrenetako bat da Larrialdiei Aurre Egiteko Euskal Sisteman integratutako administrazio publikoen arteko komunikaziorako. Sare hori erabiltzeak larrialdi-egoeretan esku hartu behar duten zerbitzuen arteko koordinazio operatiboa hobetzeko aukera ematen du, babes zibileko planen eta dagozkien taktika operatiboen arabera, besteak beste.
Horrela, Segurtasun Sailak doan emango die hiru foru-aldundietako taldeei TETRA ENBOR SAREA sarean sartzeko aukera, larrialdien kudeaketa eta arreta esklusiboki gauzatzeko dituzten eginkizunetan beharrezkoak diren komunikazioetarako. Komunikazio-ekipoak —hala nola terminal eramangarriak eta emisoreak— erostea eta mantentzea foru-erakunde bakoitzari egokituko zaio; sarearen mantentzea, balizko zabalkuntzak eta beharrezko programazioak, berriz, Segurtasun Sailak bere gain hartuko ditu.
Hitzarmenek lau urteko hasierako indarraldia izango dute sinatzen direnetik aurrera, eta, aldeek aho batez hala erabakita, beste lau urtera arteko aldi gehigarri baterako luzatu ahal izango dira.
