- Gobernu Kontseiluak Handitu Innova 2026 programa onartu du, 1,25 milioi euroko zuzkidurarekin, Euskadiko nekazaritza-ustiategietan berrikuntza teknologikoko proiektu estrategikoak babesteko.
- Laguntzek 300.000 eurotik gorako inbertsioak finantzatuko dituzte, teknologia aurreratua txertatzeko, produktibitatea hobetzeko, kostuak murrizteko eta lehen sektorearen jasangarritasuna indartzeko.
Gobernu Kontseiluak Handitu Innova 2026 programa onartu du, Euskadiko lehen sektoreko nekazaritza-ekoizpenean berrikuntza teknologikoan oinarritutako inbertsio handiak bultzatzeko laguntza-lerro berria. Programak 1,25 milioi euroko zuzkidura izango du eta aukera emango du ustiategiak eraldatzeko gai diren proiektu estrategikoak babesteko, teknologia aurreratua txertatuz.
Ekimen honen bidez, Eusko Jaurlaritzak lehiakorrago, jasangarriago eta etorkizuneko erronkei aurre egiteko prestatuago dagoen lehen sektore baten aldeko apustua indartzen du. Helburua ekoizpen-kostuak murriztea, produktibitatea hobetzea, ustiategien errentagarritasuna handitzea eta landa-ingurunean aukera ekonomiko berriak sortzea ahalbidetuko duten inbertsioak erraztea da.
Laguntzak nekazaritza-profesionalentzat, familia-ustiategientzat, kooperatibentzat, nekazaritza-sozietateentzat, CUMA erakundeentzat eta bestelako elkarte-egiturentzat daude bideratuta, betiere Euskadin jarduten badute eta 300.000 eurotik gorako berrikuntza teknologikoan oinarritutako inbertsio-proiektuak aurkezten badituzte.
Diruz lagundu daitezkeen ekintzen artean teknologia handiko makineria txertatzea, uzta-bilketarako robotika, zehaztasuneko nekazaritza, abeltzaintzako ustiategien digitalizazioa, ureztatze-sistema adimendunak, hobekuntza genetiko eta ugalketarako teknologiak, abereentzako geolokalizazioa eta itxitura digitalak, negutegien automatizazioa, minda-tratamendu teknologikoa edo energia-eraginkortasuna, uraren kudeaketa eta ingurumen-aztarna murriztea helburu duten inbertsioak daude.
Makineria eta ekipamendu berritzaileak eskuratzeaz gain, programak teknologia horiek ezartzeko beharrezkoak diren obra eta azpiegituretarako laguntzak ere jasotzen ditu, baita software, patente, azterketa tekniko eta proiektuak gauzatzeko beste gastu batzuk ere.
Dirulaguntzek inbertsio lagungarriaren %60ra arte estali ahal izango dute, proiektuaren berrikuntza-mailaren eta balorazio teknikoaren arabera.
Deialdia Euskal Herriko Agintaritzaren Aldizkarian argitaratzen den unean irekiko da, eta 2026ko urriaren 15era arte egongo da zabalik. Eskabideak elektronikoki aurkeztu beharko dira Eusko Jaurlaritzaren egoitza elektronikoaren bidez, proiektuaren memoria tekniko eta ekonomikoarekin eta oinarri arautzaileetan eskatutako dokumentazioarekin batera.
Handitu Innova programarekin, Eusko Jaurlaritzak tresna espezifiko bat gehitzen du lehen sektorean eraldaketa teknologiko handiko proiektuak babesteko, ustiategiek irtenbide berritzaileak txerta ditzaten ahalbidetuz, lehiakortasuna handitzeko eta landa-eremuetan jarduera ekonomikoa eta enplegua sortzeko.
Laguntza-lerro berri honek Eusko Jaurlaritzako Elikadura, Landa Garapena, Nekazaritza eta Arrantza Sailaren borondateari erantzuten dio, lehen sektorea modernizazio-prozesuan laguntzeko, ekoizpen-eredu eraginkorragoa, erresilienteagoa eta jasangarriagoa sendotzen duten inbertsioak sustatuz, balio erantsi handiagoa sortuz eta lurraldearen garapen orekatuari lagunduz.
