- Eragiketa horren bidez, euskal enpresa teknologikoak Erresuma Batuan duen presentzia indartuko du, bezero-zorroa handitu, eta errealitate birtualeko teknologietan eta biki digitaletan duen posizionamendua sendotu
COFIDESek, Finantzen Euskal Institutuak (FEI) eta ELKARGIk, Basque Trade & Investmenten (BTI) koordinazioarekin, Virtualware enpresak Virtalis Holding konpainia britainiarraren % 100 eskuratzea babestu dute. Virtalis Holding errealitate birtualeko softwarean, 3Dko bistaratze aurreratuan eta biki digitaletan da espezialista.
COFIDES, FEI, ELKARGI eta BTI erakundeen arteko lankidetzaren barruan kokatzen da eragiketa. Lankidetza horren helburua da euskal enpresei finantzaketa espezializatua lortzen laguntzea, eta nazioartekotze-, enpresa-hazkunde eta kanpo-merkatuen dibertsifikazio-prozesuetan laguntzea.
Erosketa honen bidez, Virtualware enpresak beste urrats bat eman du nazioartean hazi eta sendotzeko estrategian. Enpresa 2004an eratu zen, eta Euronext Growth Parisen kotizatu zuen. Enpresa-inguruneetarako murgiltze-teknologietan eta errealitate birtualean oinarritutako software-soluzioen garapenean espezializatuta dago. Tresna horiek sektore estrategikoetan erabiltzen dira, hala nola industrian, energian, azpiegitura kritikoetan eta defentsan.
Enpresaren garapen nagusien artean nabarmentzekoak dira VIROO, ingurune profesionaletarako errealitate birtualeko plataforma, eta Simumatik, biki digitalak simulatu, emulatu eta sortzeko soluzioa.
Virtalis, bestalde, 2003an eratu zen eta Manchesterren du egoitza. Ibilbide luzea du murgiltze-bistaratzearen eta biki digitalen esparruan. Enpresa britainiarrak teknologia propioa du, eta nazioarteko bezero erreferenteak defentsa, industria aurreratu, energia eta teknologiako sektoreetan.
Bi konpainien integrazioari esker, Virtualwarek nabarmen indartuko du merkatu britainiarrean duen presentzia, nazioarteko bezero berriengana iristeko aukera handituko du eta sinergia komertzialak eta teknologikoak sortuko ditu, enpresa bakoitzaren bezeroei soluzioak modu gurutzatuan eskainita.
COFIDESen, Euskal Finantza Institutuaren eta ELKARGIren babes finantzarioari esker —eta Basque Trade & Investmenten laguntzarekin— eragiketa estrategikoa bultzatu ahal izan da, hala euskal enpresa teknologiko bati dimentsioa irabazten, lehiatzeko gaitasuna handitzen eta nazioarteko merkatuetan duen hedapena bizkortzen laguntzeko.
FEI ADIERAZPENAK:
“Eragiketa hau Finantzen Euskal Institutuak lagundu nahi dituen proiektu-moten adibidea da: teknologia propioa duten euskal enpresak, dimentsioa irabazi nahi dutenak, merkatu berrietara heldu nahi dutenak eta beren nazioarteko posizionamendua indartu nahi dutenak. Erakundeen arteko lankidetzari esker, gaitasunak batu ditzakegu bokazio teknologiko eta internazional adierazgarria duten enpresak hazteko eragiketak babesteko», adierazi du Amaia del Villar FEIko zuzendari nagusiak.
COFIDES ADIERAZPENAK:
Miguel Ángel Ladero COFIDESeko Inbertsioetako zuzendari korporatiboak adierazi duenez, “teknologia eta berrikuntza funtsezko faktoreak dira Espainiako enpresen lehiakortasuna indartzeko. Horregatik, Virtualware enpresaren hazkundea babesten dugu, nazioartean duen presentzia handitu dezan, gaitasun teknologikoa indartu dezan eta merkatu estrategikoetan duen posizionamendua hobetu dezan. Eragiketa horrek agerian uzten du COFIDES Espainiako enpresen finantza-bazkidea dela nazioartean hedatzeko prozesuetan. Kanpoko merkatuetan lehiatzeko duten gaitasuna indartzen eta tamaina irabazten laguntzen die COFIDESek».
ELKARGI ADIERAZPENAK:
Zenón Vázquez Irizar ELKARGIko zuzendari nagusiak gaineratu duenez
Harro gaude eragiketa estrategiko honen finantzaketan parte hartzeagatik. Horri esker, Virtualwarek dimentsioa handituko du, gaitasun teknologikoak indartuko ditu eta nazioarteko hedapena bizkortuko du.
Hazteko eta sendotzeko apustua egiten duten enpresekin ELKARGIk duen konpromisoaren beste adibide bat da. Gure zeregina, bidelagun finantzarioak izateaz gain, finantzatzen laguntzea da, halako proiektuak egikaritu ahal izateko.
Nazioarteko bokazioa duten enpresei laguntzea, azken batean, gure sareak lehiakortasuna irabaz dezan eta merkatu globaletan duen posizioa indartu dezan laguntzea da”.
Bestalde, Unai Extremok, Virtualware enpresako CEO eta fundatzaile-kideak, nabarmen duenez, «erosketa hau mugarri garrantzitsua da Virtualware enpresarentzat, ez bakarrik eragiketa handia delako, baita produktu-zorroa indartu eta industria-bezeroen oinarria zabaltzen duelako ere».
Erakundeen arteko lankidetzari buruz
COFIDES, Finantzen Euskal Institutua eta Elkargiren arteko lankidetzaren eta Basque Trade & Investmenten koordinazioaren helburua da euskal enpresei finantzatzeko tresnak lortzen laguntzea, eta kanpoko merkatuetan nazioartekotze- eta hazkunde-proiektuak garatzen laguntzea.
Erakundeen jarduera koordinatuak finantza- eta laguntza-gaitasunak batzeko aukera ematen du, euskal enpresa-sarearen dimentsioa, lehiakortasuna eta nazioarteko presentzia sendotzen lagunduko duten proiektuak bultzatzeko.
