Rodrigo Gartzia Segurtasuneko sailburuordeak eta Bilboko Udaleko Amaia Arregi Herritarren Segurtasuneko zinegotziak eta Nora Abete Mugikortasun eta Jasangarritasunekoak gaur goizean aurkeztu dute apirilaren 11n, ostegunean, kopako finaleko garaipena ospatzeko, planifikatu diren ekitaldietako herritarren mugikortasuneko eta segurtasuneko eta Bilboko Athletic Clubi lagun egiteko dispositiboa.
Jaurlaritzak, Bizkaiko Foru Aldundiarekin, ospakizuna hartuko duten zortzi udalerriekin eta larrialdietako euskal sarea osatzen duten eragile guztiekin batera, prestatu duen dispositibo bateratuan 1.200 pertsonak baino gehiagok lan egingo dute: Ertzaintzak, udaltzaingoek, Osakidetzak, 112 SOS Deiak zerbitzuak, Gurutze Gorriak, DYAk, suteak itzaltzeko zerbitzuek, babes zibilak,…
Euskal erakundeek aurreikusten dute datorren ostegunean milioi bat pertsona baino gehiago elkar daitezkeela Bilbo Handian, batez ere itsasadarraren ertzetan. Hori dela eta, Eusko Jaurlaritzak Segurtasuneko Gida Plan bat prestatu du, iaz Frantziako Tourra Euskaditik irten zenerako antolatutakoaren eduari jarraituz.
Makro-dispositibo horrek segurtasun publiko integralaren alderdi guztiak barne hartzen ditu hiru mailetan: lehorra, itsasoa eta airea. Inplikatutako taldeek aldez aurreko lanak egingo dituzte tokian bertan, segizioaren jarraipena egingo dute eta taldeari lagunduko diote 16:00ak aldera hasiko den ibilbide osoan zehar:
- Abrako Itsas Klubetik (Getxo) abiatuko da.
- Bilboko itsasadarrean barrena bi ertzetako udalerri guztietatik igaroko da (Santurtzi, Portugalete, Leioa, Sestao, Barakaldo eta Erandio), Bilboko udaletxera iritsi arte.
- Jokalariak lehorreratu eta harrera Bilboko udaletxean.
- Ibilbidea autobusean jarraituko da, eta jokalariei bigarren harrera egingo zaie Bizkaiko Foru Aldundiaren jauregian, Gran Via kalean.
Ur-lamina
Bilboko Athletic Club taldeak baimendutako 160 ontzik lagunduta igoko du itsasadarra. Apirilaren 11ko, osteguneko, goizaldetik, Ertzaintzaren Zaintza eta Erreskate Unitateak prebentziozko ibilbideak egingo ditu Abratik Bilboko udaletxera bitartean. Droneekin, drone-inhibitzaileekin, 8 ontzirekin eta 2 helikopterorekin lan egingo du.
Aldi berean, Euskadiko larrialdietako zerbitzuek (DYAk, Gurutze Gorriak eta Suteak Itzaltzeko Zerbitzuek…) lehorrera ebakuatu ahal izateko 6 puntu ezarri dituzte: Areetako, Erandioko, Portugaleteko eta Barakaldoko ontziralekuak eta Zorrotzaurreko eta Deustuko zingiradiak. Sei puntu horiek hutsik egongo dira, polizia- eta osasun-baliabideek bakarrik erabiltzeko.
00:01etik aurrera, debekuak hasiko dira:
- Erabat debekatuta egongo da edozein eratako ontzirekin nabigatzea, amarratzea edo ainguratzea, portu-zerbitzuetakoekin izan ezik. Horrek barne hartzen ditu: ontzi partikularrak, surfeko oholak, kayakak, piraguak, flotagailuak, ontzi pneumatikoak edo bela-ontziak, uretako motorrak edo baimendu gabe dagoen beste edozein sistema flotatzaile.
- Arrapala, ontziraleku, atrakaleku, kaietan eta abarretan sartzea.
- Ebakuazio-puntu gisa balizatutako sei puntuak oztopatzea.
- Uretara salto egitea edo uretan bainatzea, edozein modutan.
- Itsasadarrera objektuak botatzea.
- Aire-espazioa erabat mugatuta egongo da; beraz, debekatuta dago baimenik gabeko droneak hegan egitea.
- Debekatuta egongo da bengalak edo pertsonen segurtasuna arriskuan jar dezaketelako arriskutsuak izan daitezkeen objektuak erabiltzea.
Itsasadarraren ertzak: 75 puntutan sartzea debekatuta
Ertzaintzak eta operatibo honetan parte hartuko duten Euskadiko 8 udaltzaingoek (600 agente baino gehiago izango dira guztira) lehorreko 75 puntu identifikatu eta seinaleztatu dituzte behar bezala, Bilboko itsasadarraren bi ertzetan. Erabat debekatuta dago jada hesiz inguratzen eta zigilatzen ari diren leku horiek blokeatzea edo horietan sartzea:
- 47 gune kritiko: horien ezaugarriak direla-eta, edo jende eta ibilgailu asko pila litezkeelako, pertsonentzat arriskutsuak izan daitezkeen leku fisikoak.
- 28 kontingentzia-puntu: Euskadiko larrialdietako zerbitzuek pertsonak artatzera edo ateratzera joan behar izanez gero, hartarako egokitutako lekuak.
Frantziako Tourraren dispositiboan egin zen bezala, Euskadiko larrialdietako sareko eragile guztiek 75 puntu horietako bakoitzaren fitxa bat dute, eta fitxa horietan agertzen dira: bertako segurtasuna kontrolatzeaz arduratuko den taldea (Ertzaintza, Udaltzaingoa, Babes Zibila…), geolokalizazioa, koordenatuak, bertan egoteko ordutegia, segurtasun-aginduak, etab.
Osasun-laguntza eta larrialdiak
Ospakizunaren osasun-asistentziako dispositiboa Osakidetzako larrialdi-zerbitzuek koordinatuko dute, eta ibilbide osoari emango dio estaldura. Horretarako, Osakidetzaren eta Larrialdiei Aurre Egiteko Euskal Sistemaren berezko baliabideez gainera, Gurutze Gorriaren eta DYAren baliabideak ere erabiliko dira, osteguneko, hilaren 11ko, 14etatik 21etara.
Dispositibo horrek 2 anbulantzia medikalizatu, erizaintza zerbitzudun 3 anbulantzia, 26 oinarrizko bizi-euskarri eta 12 osasun-postu aurreratu izango ditu, horietako asko mugikorrak, eta segizioak Bilborantz egin ahala mugitzen joango dira.
Eraginak trafikoan eta garraio publikoan
Gainera, itsasadarraren bi ertzetara jende asko hurbilduko dela aurreikusita, 8 udalerrietako hainbat kaletan eta Erandio eta Bilbo errepideek (Bi-711 itsasadarretik) mozketak eta desbiderapenak egingo dituzte. Ertzaintzaren Bizkaiko Trafikoko Lurralde Unitateak bide-segurtasuneko operatibo osagarri bat ezarri du. Operatibo horrek kontrolatuko du, inplikatutako 8 udalerrietako udaltzaingoek egindako hiri-mugikortasuneko planek lagunduta, zirkulazioa eta herri bakoitzerako, bereziki Bilborako, sarrera.
Era berean, segurtasun-dispositiboak eraginak izango ditu Bizkaiko garraio publikoan ere, eta euskal erakundeek, beraz, jendeari eskatzen diote, garraio publikoa erabili aurretik, ordutegiak, mozketak edo izan litezkeen ibilbide-aldaketak kontsultatzeko. Segurtasun-arrazoiak direla eta, eta pilatuko den jendearen eta eguneko unearen arabera, geltoki batzuk une batzuetan itxi ere egin daitezke.
Lehorreko ibilbidea: jokalarien autobusa
Itsasadarreko ibilbidea amaitzen denean, eta jokalariei Bilboko udaletxean harrera instituzionala egin ondoren, taldea autobusean joango da Bizkaiko Foru Aldundira, eta bertan bigarren harrera egingo diote.
Ibilbide horrek Bilboko kaleak zeharkatuko ditu: udaletxeko plazatik abiatuko da, Areetatik igaroko da eta Gran Via zeharkatuko du. Ibilbide osoa hesiz itxita egongo da, eta Ertzaintzaren eta Bilboko Udaltzaingoaren artean koordinatutako segurtasun-neurri zorrotzen artean.
Zure segurtasunerako, arriskurik gabe gozatzeko gomendioak
- Beti pentsatu pertsonen segurtasuna ikuskizuna bera baino garrantzitsuagoa dela.
- Kontuan izan uretako ibilbideaz lehorretik bakarrik goza daitekeela, eta ur-lamina baimendutako ontziek bakarrik erabil dezaketela.
- Ez zaitez jarri elementu ezegonkorrak izan ditzaketen arriskuko lekuetan. Itsasadarrean zehar, uneaz gozatu ahal izateko nahiko leku seguru daude.
- Errespetatu ezarritako segurtasun-eremuak eta seinaleak sarbide murriztuko eremuetan.
- Ez jarri adingabeak edo mugikortasun murriztua duten pertsonak lehen ilaran: aglomerazioa izanez gero, hesiaren edo barandaren kontra zanpatzeko arriskua egon daiteke.
- Ahal dela, garraio publikoa erabili eta behar besteko denboraz ibili.
- Ez joan ibilgailu pribatuan eta ez eraman zurekin mugikortasun pertsonaleko ibilgailuak: bizikletak, patineteak, etab.
- Beti lokalizatuta izan irteera posibleak eta ebakuazio-ibilbideak, behar izanda ere.
- Taldean joaten bazara, jende artean sartu aurretik, elkargune bat adostu, norbait jende multzoan galtzen bada ere.
- Haurrekin joaten bazara, eskutik helduta edo besoetan eraman. Adingabe bakoitza bere izenarekin identifikatu, eta harremanetarako telefono bat idatzi galtzen bada ere.
- Hala eta guztiz ere, norbait galtzen bada, larrialdietako zerbitzura jo.
- Garrantzitsua da hidratatzea, lekuan denbora luzean egon behar baduzu.
- Ez zaitez baranda, burdin-hesi edo elementu ezegonkorretara igo.
- Ez gainditu ezarritako segurtasun-lerroak eta -hesiak.
- Kontuz ibili alkoholaren edo drogen eraginpean egon litekeela uste duzunarekin, segur aski ez baita bere ekintzez jabetzen.
- Istiluren bat sortuz gero, saiatu alde egiten, eta jakinarazi segurtasun-zerbitzuei.
- Ebakuatu beharra izanez gero, lasai egon eta bizkor ibili, korrika egin gabe eta modu ordenatuan, uneoro segurtasun-zerbitzuek emandako jarraibideak betez.
- Norbaitek laguntza behar duela ikusten baduzu, saiatu laguntzen, eta gertuen dauden larrialdietako zerbitzuetara jo. Lagundu ezinduei.
- Kolaboratu segurtasun- eta larrialdi-zerbitzuekin, eta haien lana erraztu.
- Larrialdiren bat izanez gero, deitu 112ra, larrialdietarako telefono bakarrera.
Segurtasun-dispositiboa zifratan
- Euskal Poliziako 600 agentek parte hartuko dute kopako tituluaren ospakizun-ekitaldietako segurtasun-dispositiboan.
- Ertzaintzaren unitate guztietako 400 agente izango dira: Zaintza eta Erreskatea, Brigada Mugikorra, Bizkaiko Trafiko Unitatea, Esku-hartzekoa, Lehergailuak Indargabetzeko Unitatea, Txakurren Unitatea, Bizkaiko Aginte eta Kontrol Zentroa, Inteligentzia Bulego Nagusia eta itsasadarraren bi ertzetako 5 ertzain-etxeetako (Getxo, Erandio, Bilbo, Muskiz eta Sestao) Herritarren Segurtasuneko unitateak.
- Zaintza eta Erreskate Unitateak 8 ontzirekin, 2 helikopterorekin eta drone-sistema eta -inhibitzaile guztiekin lan egingo du.
- Santurtzi, Portugalete, Sestao, Barakaldo, Erandio, Leioa, Getxo eta Bilboko 200 udaltzain.
- Osakidetza, DYA eta Gurutze Gorria: 2 anbulantzia medikalizatu, erizaintza zerbitzudun 3 anbulantzia, 26 oinarrizko bizi-euskarri eta 12 osasun-postu aurreratu.
- Aldi bereko 3 koordinazio-mahai: Erandio (poliziarena), Txurdinaga (larrialdietakoa) eta Erandio (instituzionala).
- Baimendutako 160 ontzi itsasadarrean gabarrari ibilbidean laguntzeko.
- 47 puntu kritiko eta 25 kontingentzia-puntu ezarri dira taldeak itsasadarrean egingo duen ibilbidean.
- Dispositiboa prestatzen otsailaren 8an hasi ziren, Eusko Jaurlaritzak eskatuta.
Segurtasun, mugikortasun eta garbiketako operatiboak bilbon, Athletic Club Kopako txapeldunari harrera egiteko
- Zirkulazio-murrizketa gehienak apirilaren 11ko 14:00etan hasiko dira. Hala ere, kasu batzuetan aurreko gauean hasiko dira kaleak ixten – Zorrotzaurren, adibidez– edota egun horretako goizean, 08:00etatik 14:00etara bitartean, batez ere inguru hauetan: Erkoreka plaza, Zingira, Epaltzaren Alarguna, Areatza, Nafarroa, Plaza Biribila, Kale Nagusia eta Astarloa, taldea Udaletxetik Foru Aldundira eramango duen autobusaren ibilbidean hesiak jarri behar direlako.
- Operatiboa 22:00ak inguruan amaituko dela aurreikusten da; hala ere, ibilgailuen zirkulaziorako geroago irekiko dira kaleak, hesiak jaso ondoren.
- Udaltzaingoko langile gehienak prest egongo dira ezarritako dispositiboetan lan egiteko, eta, aldiz, suhiltzaileak ––haien ohiko guardiak indartu egingo dira–– taldea igaroko den lekuetan hedatuko dira, baita itsasadarrean ere.
- Garbiketa Zerbitzuko dispositiboa -giza baliabideak eta baliabide teknikoak- handia izango da eta itsasadarra garbitzeaz arduratuko da, gabarra eta gabarrarekin batera doazen ontziak igaro ondoren. Itsasadarraren inguruko kaleak ere garbituko dituzte, baita jende gehien ibiltzea aurreikusten den eremu guztietan ere.
- Udalak pantaila erraldoi bat jarriko du Udaletxe aurrean, han bildutako pertsonek ekitaldia jarrai dezaten. Era berean, espazio bat prestatuko da bereziki mugikortasun urriko pertsonek ekitaldia jarraitzeko aukera izan dezaten.
(Bilbon, 2024ko apirilaren 9an).- Athletic Club-ek Kopako titulua lortu zuen zapatuan, Sevillan, eta ospakizunak eguenean, hilak 11, egingo dira. Bada, ospakizun horiek hainbat esparrutan eragingo die herritarrei, dela mugikortasunean dela edukiontzien arloan.
Hori dela eta, dispositibo handi bat ari da prestatzen Udala, sail batzuen eta besteen artean koordinatuta: Segurtasuna, Mugikortasuna, Zerbitzuak, Espazio Publikoa…eta, halaber, komunikazioa ere indartuko da, bizilagunek jakin dezaten zer gorabehera eragingo dituen gertakizun horrek eta zer konponbide emango zaizkion.
Urian datorren eguenerako ezarritako dispositiboan, zirkulazioan aldaketak egitea aurreikusten da (kaleak itxi eta beste batzuetatik bideratu) eta neurri handiagoan edo txikiagoan ibilgailuen eta oinezkoen mugikortasuna aldatuko da, batez ere itsasadarraren ibilgutik eta autobusaren ibilbidetik hurbil dauden auzoetan; 14:00etatik 22:00etara izango dira aldaketok, gutxi gorabehera, harik eta harrerari lotutako segurtasun-operatiboa amaitutzat ematen den arte.
Arratsaldean Bilbora hurbiltzen diren edo hirian zehar ibiliko diren pertsona guztiei gomendatzen zaie garraio publikoa erabiltzea, ahal dela trenez edo metroz, egun osoan zehar zaila izango baita zirkulazioa.
ZIRKULAZIO-ETENAK ETA OINEZKOEN PASABIDEAK IXTEA
Aldaketak apirilaren 11ko (eguena) goizalde aldera hasiko dira, autobusaren ibilbidean hesia jarri ahal izateko; autobus horrek, hain zuzen ere, talde txapelduna Udaletxetik Aldundiaren Jauregira eramango du, Udaletxean harrera amaitzen denean. Hala ere, zirkulazioaren arloko murrizketa gehienak apirilaren 11ko 14:00etan hasiko dira.
Zirkulazio-aldaketa (kaleak itxi eta beste batzuetatik bideratu) horiek, funtsean, inguru hauetan egingo dira: Areatza, Ernesto Erkoreka plaza, Plaza Biribila, Udaletxeko eta Areatzako zubiak eta Kale Nagusia (Moyuaraino). Eremu horietan jende asko bilduko dela aurreikusten da; izan ere, inguru horretan amaituko da gabarraren ibilbidea – Udaletxe parean –, eta gero autobusean ibiliko dira.
Hala ere, aurreko gauetik itsasadarraren perimetroko eremu batzuk hesituta eta itxita geratuko dira. Esaterako, Zorrotzaurreko uhartera ez da sartzerik izango –egoiliarrak, zerbitzu publikoak eta larrialdi-zerbitzuetakoak salbu- eguazten gaueko (hilak 10) 22:00etatik aurrera, aparkatutako ibilgailuek ez dezaten oztopatu gabarra ikustea.
Ontziak igaro aurretik – eta igarotzen diren bitartean –, itsasadarraren bi ertzetan biltzen den jendearen arabera, eta herritarrei ahalik eta kalte gutxien eragiteko, kaleak zirkulaziorako ixten joango dira.
Olabeaga ingurua, 14:00etatik 20:00etara, gutxi gorabehera, ibilgailuentzat itxita egongo da; egoiliarrak eta larrialdi-zerbitzuak bakarrik igaro ahal izango dira, Ventosa bidetik.
Itsasadarraren ezkerraldean jarraituz, Uribitarte pasealekua itxita geratuko da ibilgailuentzat, 14:00etatik 21:30era, gutxi gorabehera. Garajeek eta aparkalekuek murrizketak izango dituzte, eta, beraz, bizilagunei gomendatzen zaie denbora-tarte horretan ibilgailu pribatua ez erabiltzea. Gainera, jende-kopuruaren arabera, Abandoibarra etorbidea eta Ramón Rubial kalea zirkulaziorako itxi ahal izango dira.
Gauza bera gertatuko da itsasadarraren beste aldean: Elorrietako erriberatik Bilbora sartzeko bidea itxi egingo da, bai eta Botikazar erribera –Agirre Anaien kalea eta Heliodoro de la Torre artean–, Unibertsitate etorbidea eta Campo Volantin ere. Kale horiek segizioa igarotzean itxiko dira, eta egoiliarrei eta Deustuko Unibertsitateko ikasleei bakarrik utziko zaie pasatzen, egoerak horretarako aukera ematen badu. Murrizketa hori 14:00etatik 20:30era egitea ere aurreikusten da, baina ekitaldia nola doan ikusi beharko da.
Pedro Arrupe eta Zubi Zuri oinezkoen pasabideak ere itxita geratuko dira, hilaren 11ko (eguena) 14:00etatik aurrera. Pasabideak prebentzioz itxiko dira ebakuazio-bide egokiak bermatzeko, jende asko aurreikusten baita.
Areatzako eta Udaletxeko zubiak ibilgailuen zirkulaziorako itxiko dira, eta gabarraren ibilbidean dauden udalerriko gainerako zubiak –Deustu, Euskalduna eta Salbe– irekita egongo dira, oinezkoen zein ibilgailuen joan-etorrietarako. Ibaiaren bi aldeetan trafikoa eteteko puntuak aurreikusi dira, eta Bilboko Udaltzaingoak kontrolerako gailu finkoak izango ditu, edozein ezustekoren edo beharren aurrean perimetroa itxi edo aldatu beharko balitz ere.
Salbe zubiko eskailerak ezin izango dira erabili; igogailua, berriz, bizilagunentzat, dibertsitate funtzionala duten pertsonentzat eta larrialdi-zerbitzuetakoentzat gordeko da.
Zingira kalea, Epaltzaren Alargunaren kalea eta Areatza kalea itxita egongo dira ibilgailuentzat, eta garajeak eta aparkalekuak sarbiderik gabe geratuko dira hesiak kendu arte. Erribera kalea ere itxi egingo da (hilaren 11ko goizaldean), Mesedeetako Zubiaren eta Areatzaren artean; eta Prim eta Askao kaleetako bizilagunei bakarrik utziko zaie sartzen, baita garraio publikoari ere, bidea erabat itxi arte. Erabateko mozketa egin ondoren, Plaza Berriko eta Prim kaleko garajeetarako sarbidea Aurrekoetxetik seinalisten txandakako pasabidearen bidez egingo da.
Normaltasuna berreskuratuko duen azken tartea txapeldunen autobusa pasatuko den tartea izango da, hau da, Udaletxearen eta Aldundiaren artekoa. Ibilbide horretan, Kale Nagusia – plaza Biribilaren eta Moyua plazaren artean –, Astarloa – Rodríguez Arias eta Kale nagusiaren artean – eta Nafarroa kalea itxi beharko dira.
Dena den, kontuan izan behar da trafikoa eteteko eta desbideratzeko ordutegiak aldatu egin daitezkeela ekitaldiaren garapenaren arabera.
ALDAKETAK GARRAIO PUBLIKOAN
Zirkulazioa etenda dagoen bitartean, batez ere 14:00etan eta 20:00etan, gutxi gorabehera, Bilbobuseko greba dela-eta ezarritako gutxieneko zerbitzu gehienek eragina izango dute bai ibilbidean, bai ohiko buruetan.
Desbideratzeei eta geldialdiak kentzeari eta aldatzeari buruzko informazioa ohiko bideen bidez emango da (sare sozialak, informazio-panelak, markesinak…). Informazio gehiago www.bilbao.eus/bilbobus webgunean edo 010 telefonoan.
Trafiko-etenak direla eta, bidegorri zati batzuk, taxi geltoki batzuk, Bizkaibuseko linea batzuk eta tranbia ere kaltetuko dira.
SEGURTASUNAREN ETA LARRIALDI ZERBITZUEN ANTOLAMENDUA
Udaltzaingoko langile gehienak prest egongo dira Ertzaintzarekin batera ezarriko diren dispositiboetan modu koordinatuan lan egiteko, eta, hala, ospakizuna bera eta uriko bizilagunen segurtasuna jagongo dituzte.
Gainera, Babes Zibileko Zuzendaritzak suhiltzaileen dispositibo handi bat prestatu du, prebentzioko eta jarduneko zereginetarako. Egun horretarako guardian 62 udaltzain egongo dira Deustuko parkean (12 udaltzain eta 4 ibilgailu) eta Miribillakoan (22 udaltzain eta 15 ibilgailu), udaletxetik gertu (11 udaltzain eta 3 ibilgailu) eta itsasadarrean. Zehazki, uretan hamahiru suhiltzaile egongo dira, horietatik hamar urpekariak, eta hiru salbamendu-ontzi.
GARBIKETA ZERBITZUA ETA HONDAKINEN KUDEAKETA
Bilboko Udalak garbiketa-operatibo berezi bat prestatu du, garbiketa-, ekortze-, baldeo- eta desinfekzio-ekipoz osatutako aparteko errefortzu bat barne hartzen duena, gabarraren ibilbidearen aurretik, bitartean eta ondoren hiria erabiltzeko moduan mantentzeko.
Horrela, gabarra igaro aurretik itsasadarra egoera onean geratuko dela bermatuko da, urte osoan zeregin horretaz arduratzen den itsasontziarekin. Eta itsasontzien segizioa igaro ondoren, ur-xaflaren beste garbiketa bat egingo da, eta garbiketa hori Athletic Clubek egingo du.
Gainera, bigarren garbiketa bat egingo da, sakonagoa. Hurrengo egunean, apirilaren 12an, egingo da, marea behean dagoela.
Hainbat langilek eta baliabide tekniko ugarik osatutako dispositiboa izango da; baliabide teknikoen artean, ekortzeko moto-orgak, hidrogarbigailuak, furgonetak, urez garbitzen duten makinak… Nabarmentzekoa da galtzadak garbitzen hiru talde arituko direla, arratsaldeko, gaueko eta goizeko txandatan.
PANTAILA ERRALDOIA ETA MUGIKORTASUN URRIKO PERTSONENTZAKO ESPAZIOA
Bilboko Udalak pantaila erraldoi bat jarriko du Udaletxe Jauregiaren aurrean, bildutako pertsonek ekitaldiaren emankizuna jarraitzeko aukera izan dezaten.
Era berean, gabarraren ibilbidean zehar espazio bat egokituko da, mugikortasun murriztua duten pertsonek ikuskizunaz gozatzeko aukera izan dezaten lehentasunezko eremu batetik.
Guggenheim Bilbao Museoaren ondoan kokatuko da, eta pasabidearen amaieratik hasi eta Armiarma aldea eta Salbeko zubiaren estriboraino hartzen du. 350 pertsonentzako edukiera izango du.
Espazio hori langileen laguntza izango dute –sarbideak kontrolatzeko eta egokitzeko–, eta sarrera librekoa izango da edukiera bete arte. Horregatik, denbora nahikoarekin joatea gomendatzen da.
HERRITARRENTZAKO OHARRAK
Bilboko Udalak hainbat abisu prestatu ditu gabarraren ospakizunak eta Athletic Clubek Udalean eta Aldundian izandako harrerek eragindako gune eta auzoen berri herritarrei emateko, ostegunerako aurreikusitako trafiko-murrizketen inguruan.
Guztira, 3.000 abisu inguru jarriko dira atarietan, bizilagunek horren berri izan dezaten.
