Gipuzkoako Foru Aldundiko Mugikortasuneko, Turismoko eta Lurralde Antolaketako Departamentuak Guztiok Mugituz saria eman dio duela mende batetik Azkoitian sustraitutako familia-konpainia honi
Gipuzkoako Foru Aldundiko Mugikortasuneko, Turismoko eta Lurralde Antolaketako Departamentuak, Guztiok Mugituz sariarekin, Azkoitiko La Guipuzcoana enpresaren ibilbidea saritu du, aurten bere mendeurrena betetzen baitu. Saria urtero ematen zaie mugikortasun jasangarria sustatzen duten pertsona edo erakundeei.
Donostiako Aquariumean egin den ekitaldian, Miguel Ángel Páez Azpiegituretako eta Mugikortasun Jasangarriaren sailburuordeak nabarmendu duenez, “duela ehun urte jada garrantzitsua bazen Azkoititik lurraldeko beste puntu batzuetara iritsi ahal izatea, orain mugikortasuna funtsezkoa da beste eskubide batzuk eskuratzeko, hala nola hezkuntza edo osasuna. Bermatzen du lantoki batera joan ahal izatea, gure aisialdiaz gozatzera, kulturara, kirolera… iritsi ahal izatea. Azken batean, modu jasangarrian, eskuragarrian eta eraginkorrean mugitu ahal izateak gizarte kohesionatuago bat bihurtzen du Gipuzkoa, gizarteari eta lurraldeari dagokienez”.
Bere aldetik, Azahara Dominguez diputatuak enpresa horren “ibilbide eredugarria, etorkizuneko ikuspegi arduratsu eta gizatiarrarekin konprometitua” azpimarratu du, “mende batean zehar Gipuzkoa lurralde hobea eta bizigarriagoa izaten lagundu duena”. “Ulertu zuten ezinbestekoa zela bermatzea pertsona guztiek, bizi ziren tokian bizi zirela, zerbitzuak, enplegua, hezkuntza eta bizitza soziala eskura izatea. Eta garraio publikoaren alde eginez egin zuten, eredu jasangarri, irisgarri eta solidario gisa”, gaineratu du.
Azkenik, La Guipuzcoana-ko administratzaile Jose Luis Iraetak eskerrak eman dizkie “mendeurreneko bidaia” honetan La Guipuzcoana-ri lagundu dioten “pertsona, erakunde, entitate eta bestelako erakunde” guztiei. “Sari honek motibatu egiten gaitu kalitatezko zerbitzu hurbil, jasangarri eta gizatiarrean aurrera egiten jarraitzeko, non pertsonak diren arreta-gune eta haien ongizatea helburu”, esan du.
