Jon Insausti alkateak kohesio sozialaren, jasangarritasunaren eta parte-hartze demokratikoaren balioak aldarrikatu ditu Europako Astearen hasieran
Jon Insausti alkateak Donostia europar proiektuaren zutabe aktibo gisa aurkeztu du, “bere euskal nortasunetik, bokazio atlantikotik eta zientziaren eta ezagutzaren aldeko apustutik». Europako Astearen hasiera dela eta, alkatea «Testuinguru etikoa: Europako balioak kaos geopolitikoaren aurrean» izeneko jardunaldiaren buru izan da udaletxeko udalbatza aretoan. Bertan defendatu duenez, «egungo erronkei kohesio sozialarekin, jasangarritasunarekin eta parte-hartze demokratikoarekin aurre egiteko gaitasun kolektiboaren araberakoa izango da etorkizuna«. Gaineratu duenez, «Donostiatik, Europa ez da urruneko ideia: egunero, auzoz auzo, pertsonaz pertsona eraikitzen den errealitatea da«.
Jardunaldian, Antonio Vitorino Justizia, Oinarrizko Eskubide eta Herritartasunaren Europako komisario ohiak hogeita hamar bat eragile ekonomiko, sozial eta instituzionalen aurrean hitz egin du.
Herritarren konpromisoa
Jardunaldiaren amaieran, Jon Insaustik adierazpen instituzional bat irakurri du, eta bertan adierazi duenez, «desafekzio politikoaren eta diskurtso euroeszeptikoen gorakadaren testuinguruan, funtsezkoa da herritarren parte-hartzea eta elkarrizketarako guneak indartzea«. Zentzu horretan, «Donostiak herritarren konpromisoaren tradizio sendoa du, eta hori lantzen jarraitu behar du, tokian tokiko demokrazia indartzeko«, azpimarratu du.
Insaustik gogorarazi duenez, «Donostian martxan jarri diren migratzaileen integraziorako, genero-berdintasunerako eta gizarte-arretarako programek indartu egiten dute Europak guztiontzako eskubide- eta aukera-gune izan behar duela dioen ideia«.
Era berean, Donostiak «ikerketa, berrikuntza eta eraldaketa digitalaren» alde egindako apustua nabarmendu du, «bere garapen-ereduaren adibide gisa«. Azken batean, alkateak azaldu duenez, «Donostiak bat egiten du Europako hiri askoren erronkekin. Etxebizitza eskuratzeak, bizi-kostua handitzeak eta presio turistikoak herritarren gizarte-kohesioa eta bizi-kalitatea probatzen dituzte. Erronka horiei heltzeko politika ausartak, Europako lankidetza eta nazioarteko erakargarritasunaren eta eguneroko bizitzaren arteko oreka justua behar dira«.
