Turismo, Merkataritza eta Kontsumo Sailak Emaus denden sarerako proiektu komertzialaren bigarren fasea onartu du Gobernu Kontseiluan. Fase horren helburua da Emausen denden sarea dinamizatzea, ekonomia sozial eta zirkularraren inguruko topagune bihurtzeko. Bertan, bigarren eskuko produktuen salmenta sentsibilizazio-jarduerekin, komunikazio-kanpainekin eta fidelizazio-sistemarekin osatzen da. Horrek guztiak tokiko merkataritza dinamizatzen, publiko berriak erakartzen eta denda-sareak ekonomia sozial eta zirkularraren barruan duen posizioa indartzen laguntzen du.
2025-2026an burututako lehen fasea hiru ildo estrategikotan oinarritutako ekintza-plan batean oinarritu zen:
- Publiko berriak erakartzeko eta sentsibilizatzeko tailerrak, denda-sarea dinamizatzeko eta merkataritza jasangarrian trebatu eta erreferentzia izateko gune gisa duten zeregina indartu dezaten.
- Marketina eta komunikazioa, plan egituratu batekin, Fundazioaren marka merkataritza jasangarriaren eta inklusiboaren erreferente gisa birkokatu dadin, eta erakarriko duen bezeroa izan dadin bigarren eskuan aukera moderno eta jasangarri bat bilatu nahi duena, ekonomia zirkularrarekin lerrokatua, eta kontsumo kontzientearekin eta gaurkoarekin konektatzen duena.
- CRM bat (software tresna bat, enpresei beren bezeroekiko interakzio guztiak kudeatzen laguntzen diena) eta Denda Kluba garatzea: Tresna horrek Emausen denden kudeaketa komertziala optimizatu nahi du, bezeroak fidelizatu, komunikazioa pertsonalizatu, balio erantsiko zerbitzu bat eskaini, eta bigarren eskuko merkataritzari lotutako komunitate aktibo bat sendotu.
Fase berri honek 65.907 €-ko zenbatekoa du guztira, eta 2026-2027an garatzeko ekintza-plan bat du, lau ildo estrategikotan oinarrituta:
- Ekonomia zirkularreko tailerrak: Denden sarea dinamizatzeko eta merkataritza jasangarrian trebatzeko eta erreferentzia izateko gune gisa duten zeregina indartze aldera. Tailerrak tresna bat dira berrerabilera, konponketa eta moda jasangarria herritarrei hurbiltzeko, publiko berriak erakarrita, batez ere gazteak, bigarren eskuko dendetara. Proposamenak 17 jarduera-eremu hartzen ditu barne, besteak beste, ehungintza (upcycling eta kustomizazio sortzailea, oinarrizko joskintza, estilismoa bigarren eskuko arroparekin eta kolorimetria), etxea eta bazarra (etxeko objektuak berrerabiltzea eta pertsonalizatzea), altzariak (altzarien oinarrizko zaharberritzea eta berrerabiltzeko teknikak) eta haurrak eta familiak (txikitatik sormena eta ingurumen-sentsibilizazioa sustatzeko tailerrak, berrerabiltzeko eta konpontzeko jarduera praktikoen bidez).
- Dendetako konponketa-guneak: Jarduera-ildo berri honen helburua da, konponketa, ekonomia zirkularraren zutabeetako bat, indartzea, produktuen bizitza baliagarria luzatzen eta berrerabilera-tasak handitzen laguntzeko.
- fasea – CRM komertziala eta Fidelizazio Kluba: CRM sistema komertzialaren II. fasea garatzea planteatzen da, 2025ean egindako analisi, diagnostiko eta definizio funtzionaleko prozesuari jarraitasuna emanez. Proiektuaren bigarren fase honen helburua da CRMren soluzio teknologikoa garatzea eta ezartzea, bezeroak kudeatzeko, publikoak segmentatzeko eta komunikazio eta dinamizazio komertzialeko ekintzak garatzeko beharrezkoak diren funtzionalitateak txertatuta.
- Marketina eta komunikazioa: Helburua Emausen bigarren eskuko denda-sarearen proiekzio publikoa indartzea da, berrerabilerari, merkataritza sozial eta zirkularrari eta dinamizazio komunitarioari lotutako gune gisa duen zeregina, baita proiektuaren esparruan garatutako jarduerak ere, ikusarazteko. Bigarren fase honetan estrategia horri jarraitasuna ematea eta sendotzea planteatzen da, eraginkortasuna erakutsi duten kanalak eta formatuak mantenduta eta proiektuaren garapenarekin lotutako eduki berriak sartuta, batez ere konponketarekin dendako zerbitzuak zabaltzearekin lotutakoak.
Emaus Fundazioari buruz
Emaus Fundazioa 1980an sortu zen, Errenterian, gizarte-bazterketako egoeran dauden pertsonei enplegu-aukera bat eskaintzeko, ekonomia zirkularraren esparruan. Gaur egun, 300 pertsonak baino gehiagok osatzen dute Fundazioa, laneratzeko bi enpresa biltzen dituena, eta gizarteratzeko eta laneratzeko 46 lanpostu sortzen dituzte.
Emaus Fundazioari buruzko informazio gehiago esteka honetan: https://www.emaus.com/es
