Eusko Jaurlaritzako Ogasun eta Finantza Sailak ostegun honetan, ekainaren 4an, Londresen eman dio amaiera aurreko egunean Amsterdamen hasitako nazioarteko roadshowari, Europako finantza-plaza nagusietako bitan lehen mailako inbertitzaile instituzionalekin bilerak egin ondoren. Bira horretan egindako lan-bileretan, ordezkaritza instituzionalak interes inbertitzaile handia antzeman du Euskadi Eraldatuz 2030 planarekin lotzen den hurrengo zor-jaulkipenaren inguruan. Topaketa horiek baliatu ditu, halaber, Euskadik etorkizuneko ikuspegia duen ekonomia kaudimendunaren irudia indartzeko.
Londresen egindako jardunaldian, Noël d ‘Anjou Ogasun eta Finantzetako kontseilaria buru duen ordezkaritzak topaketa-agenda bizia garatu du Europako, AEBetako eta Asiako nazioarteko kudeatzaile handien talde handi batekin. Sailburuarekin batera, José Corchón Finantza Politikako eta Aurrekontuetako sailburuordea, Juan Alberdi Finantza Politikako eta Gizarte Aurreikuspeneko zuzendaria, Amaia del Villar Finantzen Euskal Institutuko zuzendari nagusia eta Eneritz Bilbao Kabinete eta Komunikazioko zuzendaria izan dira.
Erakunde horiek nazioarteko ekosistema finantzarioaren profil desberdinak ordezkatzen dituzte: kapital-merkatuetan presentzia handia duten banku global handietatik hasi eta munduko aktiboen kudeatzaile handienetako batzuetaraino, baita nazioarteko garrantzia duten funts subiranoak eta inbertsio-plataforma alternatiboak ere.
Bilera horietan, Noël d’Anjou sailburuak Eusko Jaurlaritzaren estrategia nabarmendu du, eta Euskadik jaulkitzaile sendo eta fidagarri gisa duen posizioa azpimarratu du, baita finantza-egonkortasuna eta ikuspegi eraldatzailea uztartzeko duen gaitasuna ere.
Bigarren jardunaldi honetan, Jose Corchón sailburuordeak eta Juan Alberdi zuzendariak sakontasun handiagoz garatu dituzte finantza-alderdiak, eta arreta jarri dute Euskal Autonomia Erkidegoko ereduaren sendotasunean, finantza publikoen jasangarritasunean eta 2026rako finantzaketa-estrategian.
Corchón sailburuordeak aditzera eman du Eusko Jaurlaritzak aurrea hartzea eta zuhurtzia ardatz dituen politika jarraitu duela, eta, horri esker, nazioarteko merkatuetan oso lehiakorra den arrisku-profila mantendu ahal izan duela. Bestalde, Alberdi zuzendariak nabarmendu du garrantzi handikoa dela merkatuetan presentzia izaten jarraitzea eta tresnak dibertsifikatzea, inbertsioaren konfiantza sendotu dadin.
Roadshow honen elementu bereizgarrietako bat izan da Amaia del Villar Finantzen Euskal Institutuko zuzendariak Euskadi Eraldatuz 2030 plana aurkeztu izana eta inbertitzaileei estrategia horrek duen dimentsio eraldatzailearen berri eman izana. Del Villarrek azaldu du planak finantza-tresna berriak eta lankidetza publiko-pribatuko mekanismoak egituratzen dituela, inbertsioa sektore estrategikoetarantz mobiliza dadin, industria-lehiakortasuna indartu dadin eta erronka ekonomiko eta sozial handiei aurrea har dakien.
Testuinguru horretan, Eusko Jaurlaritzak bereziki nabarmendu du hurrengo zor-jaulkipena Euskadi Eraldatuz planaren esparruan egingo dela, betiere Euskal Finantza Aliantzaren hedapenarekin eta inbertsio publikoko 1.000 milioi euro gehigarri mobilizatzearekin lotutako ezohiko eragiketa gisa. Sailburuak berak adierazi duenez, estrategia horren bidez, helburu zabalago baten zerbitzura jarriko da finantzaketa publikoa: Euskadiren eraldaketa ekonomikoa bizkortzea eta hazkunde-aukera berriak sortzea.
Roadshowaren balorazioa
Roadshowaren azken balorazioan aditzera eman duenez, “Amsterdamen eta Londresen oso bilera emankorrak egin ditugu, eta egiaztatu dugu nazioarteko inbertitzaileek interes handia dutela eta Euskadiko Bonuaren jaulkipen berriaren inguruan gose handia dagoela”. Era berean, adierazi duenez, “Euskadik erakusten du finantza-kaudimena, inbertsio-gaitasuna eta etorkizunerako ikuspegia konbina daitezkeela, eta, horri esker, merkatuetan konfiantza eta herritarrengan ongizatea sortu daitekeela”.
Sailburuak, gainera, finantza-eragiketa horren izaera estrategikoaren berri eman du, eta adierazi du Eusko Jaurlaritza inbertitzaileekin epe luzeko harremanak sendotzeko helburuarekin joan dela bilera horietara, eta mezu argia helarazi nahi izan die: finantzaketa ekonomia-eraldaketaren zerbitzura dagoen tresna da.
Ordezkaritza instituzionalak oso balantze positibo egin du, eta nabarmendu ditu nazioarteko erreferentziazko inbertitzaileekin izandako solasaldi-maila handia eta helarazitako mezu nagusien harrera ona.
Ildo horretan, Eusko Jaurlaritzak egiaztatu du finantza-kaudimenaren, egonkortasun instituzionalaren, industria-oinarri sendoaren eta eraldaketa-estrategia argiaren konbinazioak interes handia pizten jarraitzen duela nazioarteko komunitate inbertitzailean. Horrez gain, berretsi da Euskadik merkatuetan duen posizionamenduaren indarra, inbertsio-oinarri dibertsifikatuarekin eta hurrengo jaulkipenaren aurrean eskari potentzial sendoarekin —aurreko eragiketetan izandako portaeran ildo beretik—.
D’Anjou sailburuak laburbildu duenez, “roadshowaren mezua argia izan da: Euskadi kaudimenaren eta konfiantzaren sinonimoa da, baita anbizioaren eta etorkizunaren sinonimo ere”, bileretan atzemandako gero eta interes handiagoari erreparatuta.
Amsterdamen eta Londresen bete den agenda trinkoarekin, Eusko Jaurlaritzak finantza-nazioartekotzeko estrategia sendotu du, eta beste urrats bat egin du hurrengo merkaturatzea prestatzeko —baldintzek aukera ematen badute, datozen egunetan gauzatu ahal izango da—.
