- Lankidetza eta Elkartasunerako Euskal Agentziak nazioarteko lankidetzarekiko konpromisoa indartu nahi du horrela, erakundeen gaitasunak eta garapen iraunkorra indartuko dituena eta krisi humanitarioek kaltetutako biztanleei arreta emango diena
- eLankidetzak 350.000 euroko zuzeneko dirulaguntzak emango ditu Kuban lurralde-garapena indartzeko eta Sudaneko krisi humanitariori erantzuteko
Gobernu Kontseiluak 350.000 euroko zuzeneko bi dirulaguntza ematea onartu du astearte honetan, ekainaren 9an, Nazio Batuen Erakundeak Kuban eta Sudanen bultzatutako ekimenak laguntzeko. Bi jarduera horiek Eusko Jaurlaritzak nazioarteko lankidetzarekin, erakundeak indartzearekin eta krisi humanitarioei erantzutearekin duen konpromisoaren barruan kokatzen dira.
Nazio Batuek Kuban duten Garapenerako Programarako (PNUD) zuzeneko dirulaguntzak ‘Habanako Aurrerapena bere etorkizunerantz: Habanako Garapen Probintzialeko Estrategiaren inplementazio integrala eta monitoretza’ proiektua bultzatuko du. Laguntzaren helburua da Habanako Garapen Probintzialeko Estrategia ezartzeko eta gainbegiratzeko ardura duen taldearen gaitasunak indartzea. Estrategia hori berriki onartu du probintziako gobernuak, bost dimentsiotan oinarritutako garapen integrala sustatzeko ibilbide-orri gisa: iraunkortasun instituzionala, kulturala, soziala, ekonomikoa eta ingurumenekoa.
Kubako hiriburuak erronka handiak ditu erakundeen arteko koordinazioarekin, energia-baliabideak eskuratzearekin, hondakinen kudeaketarekin, etxebizitzarekin edo inbertsioak mugatzearekin lotuta, herrialde osoari eragiten dioten egiturazko mugak dituen testuinguru batean. Errealitate horren aurrean, Garapen Probintzialeko Estrategiak erantzun integrala artikulatu nahi du, eragile publikoak, pribatuak eta sozialak lurralde-ikuspegi batetik koordinatuz.
PNUDek bost hamarkada baino gehiagoko ibilbidea du egina Kuban, eta ibilbide luzea tokiko gobernantza eta deszentralizazio-prozesuak indartzen. Habanako Gobernuari lagunduko dio estrategia hori hedatzen.
eLankidetzako dirulaguntza bi aurrekontu-ekitalditan banatuko da: 150.000 euro 2026an eta 100.000 euro 2027an. Gainera, ekarpen hori zenbateko bereko beste dirulaguntza batekin osatuko da, Kanpo Harremanetarako eta Euskadi Globaleko Idazkaritza Nagusia izapidetzen ari dena.
Ekimen hau Euskadiren eta Kubaren arteko hogeita hamar urte baino gehiagoko lankidetzaren eta eLankidetza eta Kubako Kanpo Merkataritzako eta Atzerriko Inbertsioko Ministerioaren (MINCEX) artean sinatutako Elkar Ulertzeko Memorandumaren baitan kokatzen da. Memorandum hori 2028ra arte izango da indarrean, eta lurralde-garapena eta deszentralizazioa lehentasunezko lankidetza-eremu gisa identifikatzen ditu.
Erantzun humanitarioa Sudanen
Onartu den zuzeneko beste dirulaguntza, 100.000 eurokoa, Nazio Batuen Giza Gaiak Koordinatzeko Bulegoak (OCHA) jasoko du, Sudanerako Funts Komun Nazionalari laguntzeko, hori baita herrialdean erantzun humanitarioa finantzatzeko nazioarteko mekanismo nagusietako bat.
Gatazka hasi eta hiru urtera, Sudanek munduko krisi humanitario handiena den krisia bizi du Nazio Batuen aburuz. Bederatzi milioi pertsonak baino gehiagok herrialde barruan mugitu behar izan dute, eta beste 4,5 milioik inguruko herrialdeetan bilatu dute babesa. Guztira, 34 milioi pertsona inguruk premiazko laguntza humanitarioa behar dute.
eLankidetzaren ekarpena lagungarria izango da 2026ko Sudanerako Erantzun Humanitarioko Planarekin bat datozen esku-hartzeak finantzatzeko. Esku-hartze horien helburua da hainbat arlotan oinarrizko beharrak asetzea, hala nola elikaduran, ura eta saneamendua eskuratzean, osasunean, ostatuan eta kaltetutako herritarren babesean.
Funts Komun Nazionalek (Country Based Pool Founds) aukera ematen dute emaile askoren baliabideak premia humanitario premiazkoenetara bideratzeko, eta, hala, larrialdi-egoeratan erantzun azkarra, koordinatua eta eraginkorra eman ahal izateko.
Bi erabaki horien bidez, eLankidetzak indartu egin nahi du nazioarteko lankidetzarekiko duen konpromisoa, erakundeen gaitasunak eta garapen jasangarria indartzera eta krisi humanitarioek eragindako biztanleei arreta ematera bideratuta dagoena. Onartutako laguntzek 2030 Agendan aurrera egiten eta gizarte erresilienteagoak, inklusiboagoak eta jasangarriagoak eraikitzen laguntzen dute.
