Laneko Medikuntza eta Erizaintzako UPV/EHU-OSALAN María Isabel Bilbao Bengoechea Katedrak hainbat arlotako adituak bildu ditu jardunaldi honetan, erakundearen ongizatea ikuspegi integral batetik aztertzeko.
Bilboko Bizkaia Aretoan gaur egin den «Ongizate korporatiboa lan-osasunean» ikastaroak ikuspegi osoa eta eguneratua eskaini du laneko osasunaren bilakaerari buruz, pertsonen ongizatea ardatz duten ereduetarantz. Inaugurazio instituzionalean, besteak beste, Lourdes Iscar Osalaneko zuzendari nagusiak parte hartu du, eta Laneko Medikuntza eta Erizaintza espezialitateek laneko osasunaren eta segurtasunaren sustapenean duten funtsezko zeregina nabarmendu du. Era berean, esparru horretan izandako ikuspegi-aldaketa nabarmendu du, lanpostuan soilik zentratzetik lan-ingurune osoa kontuan hartzera igaro baita.
Jardunaldian zehar, topaketaren izaera multidiziplinarra islatu duten hainbat hitzaldi eman dira. Hainbat gai jorratu dira, hala nola erizaintzaren ikuspegiak erakundeetan ongizateari egiten dion ekarpena, enpresa-eredu osasungarri eta iraunkorretarako bilakaera edo lantaldeen osasun fisikoa eta mentala optimizatzeko zientzia lan-ingurunean aplikatzean oinarritutako Work On kontzeptua. Era berean, esperientzia praktikoak aurkeztu dira, hala nola, profesionalen osasuna hobetzeko eta enpresa-kulturan ongizatea integratzeko aplikazioen erabilera.
Ikastaroaren azken blokean Osalaneko Laneko Erizaintzako erizain espezialistek eta Laneko Osasuneko teknikariek, Begoña Salgadok, Amaia Etxebarriak eta Eneritz Urruzolak parte hartu dute. Beren hitzaldian, lan-osasunaren kudeaketan izandako paradigma-aldaketa aztertu dute, eta azaldu dute nola eboluzionatu den kaltearen kontrolean oinarritutako eredu klasiko batetik pertsonarengan oinarritutako ikuspegi integral batera. Testuinguru horretan, Laneko Erizaintzak osasun-arazoak goiz detektatzeko eta erakundeetan ongizatea sortzeko duen zeregin estrategikoa nabarmendu dute.
Era berean, eremu horretako espektatibei, antolaketa-oztopoei eta benetako beharrei buruzko inkesta berri baten ondorioak aurkeztu dituzte. Azkenik, modu iraunkorrean osasuna sustatzeko programak diseinatu, ezarri eta ebaluatzeko metodo praktiko baten oinarriak ezagutarazi dituzte.
