Gobernu Kontseiluak, Begoña Pedrosa Hezkuntza sailburuak proposatuta, 2026-2027 ikasturterako EUSKARARTEA diru-laguntzen deialdia onartu du gaur, Euskadiko itunpeko ikastetxeetako eskola-eremuan euskararen erabilera sustatzeko.
Deialdi honek 190.000 euroko diru-laguntza du eta bere helburua da ikastetxeetan euskararen erabilera sustatzea, ikastetxeek eurek antolatutako hezkuntza, kultura eta komunitateko jardueren bidez.
EUSKARARTEA ekimenak jarraipena ematen die Hezkuntza Sailak ikastetxeetan euskararen erabilera sustatzeko, euskal kulturaren transmisioa indartzeko eta ikasleek hizkuntza testuinguru desberdinetan erabil dezaten laguntzeko bultzatutako ekimenei.
Laguntza hauei esker, ikastetxeek berek antolatutako jarduerak egin ahal izango dira hiru eremu handitan, ikasgelaren barruan nahiz kanpoan:
- Euskal kulturarekin eta haren transmisioarekin zerikusia duten proiektuak.
- Euskararen erabilera eta hizkuntzarekiko atxikimendua sustatzeko jarduerak.
- Euskadiko, Nafarroako eta Iparraldeko ikastetxeen arteko trukeak, testuinguru soziolinguistiko ezberdinetan elkar ezagutzea eta euskararen erabilera bultzatzeko.
Diruz lagundu daitezkeen ekimenen artean daude antzerkiarekin, bertsolaritzarekin, musikarekin, ahozko narrazioarekin, ikus-entzunezko sorkuntzarekin, podcast-ekin, irratiarekin, literaturarekin edo ilustrazioarekin lotutako jarduerak, eta baita ikasleen kontzientzia soziolinguistikoa indartzera bideratutako tailer, hitzaldi, mintegi eta proiektu komunitarioak ere.
Deialdi horrekin, Eusko Jaurlaritzak berretsi egiten du euskara sustatzeko eta herritar eleaniztunak, kohesionatuak eta euskal kulturarekin konprometituak sortzen lagunduko duten hezkuntza-inguruneak garatzeko konpromisoa.
