- 2026/2027 denboraldiak iraganaren eta etorkizunaren arteko elkarrizketa proposatzen du, berdintasunarekiko konpromisoa indartzen du eta euskal talentuarentzako aukera berriak irekitzen ditu
- Ibone Bengoetxea vicelehendakaria: «Euskadiko Orkestra kontzertu-programazio bat baino askoz gehiago da: herriaren zerbitzura dagoen kultura-proiektua da, hezi, inspiratu, komunitatea sortu eta gure kultura-ondarea belaunaldiz belaunaldi transmititzen laguntzen duena»
Ibone Bengoetxea lehen lehendakariorde eta Kultura eta Hizkuntza Politikako sailburuak eta Roberto Ugarte Euskadiko Orkestrako zuzendari nagusiak gaur aurkeztu dute orkestraren 2026/2027 denboraldia. Denboraldiak Vibrar izango du lelo, eta iraganaren eta etorkizunaren arteko elkarrizketa proposatzen du hamar programa sinfonikoren eta berrogeita hamar kontzerturen bidez. Nabarmentzekoak dira, besteak beste, Aita Donostiaren La vie profonde de Saint François d’Assise obraren berreskurapena, Parisko estreinalditik ehun urtera; Jesús Guridiren Diez melodías vascas obraren interpretazioa, lehen Eusko Jaurlaritzaren 90. urteurrenaren harira; nazioarteko artista handien presentzia; eta euskal talentu gaztearen aldeko apustua.
Aurkezpena Donostiako Victoria Eugenia Antzokiko Club Aretoan egin da, eta bertan parte hartu dute Luken Munguira tenoreak; José Luis Aramburu Orfeón Donostiarraren presidenteordeak; Gorka Miranda Easo Abesbatzaren ordezkariak; Carmen Martínez Guerra Bilboko Koral Elkarteko gerenteak; eta Elena Martínez de Murguíak, Aita Donostiaren iloba-bilobak. Denboraldi berria markatuko duten proiektu nagusietako batzuk aurkeztu dituzte guztiek.
Bere hitzaldian, vicelehendakariak programazio osoa zeharkatzen duten hiru ideia nagusi azpimarratu ditu: euskal kultura-ondarearen transmisioa, berdintasunaren balioekiko konpromisoa eta bikaintasunaren zein talentuaren aldeko apustua. Ildo horretan, Eusko Jaurlaritzak bultzatutako lanari esker Aita Donostiaren obra berreskuratu izana nabarmendu du, baita Marzena Diakun eta Delyana Lazarova emakume zuzendarien parte-hartzea eta Jone Martínez zein Luken Munguira bezalako euskal interprete gazteen presentzia ere. Gainera, Euskadiko Orkestra «herriaren zerbitzura dagoen kultura-proiektua» dela defendatu du, memoria zaintzeko, artista belaunaldi berriak sustatzeko eta kulturaren bidez gizarte-kohesioa indartzeko gaitasuna duena.
