• Ongizate, Gazteria eta Erronka Demografikoko Sailak nazioarteko biltzarra antolatuko du, urriaren 8an eta 9an, Bilboko Euskalduna Jauregian.
• Hainbat herrialdetako hizlariek eta ordezkariek proposamen zehatzak egingo dituzte garrantzi bereziko une batean: Migrazio eta Asilorako Europako Itunaren (PEMA) ezarpena eta pertsona atzerritarren ez-ohiko erregularizazioaren kudeaketa eta garapena.
Eusko Jaurlaritzako Ongizate, Gazteria eta Erronka Demografikoko Sailak Atzerritartasun Zuzenbide, Harrera eta Integrazioari buruzko Nazioarteko I. Biltzarra antolatuko du, Etorkinen Harrera eta Integraziorako Zuzendaritzaren bitartez, 2026ko urriaren 8an eta 9an, Bilboko Euskalduna Jauregian. Ekimena argi eta garbi bereizgarria den bokazioarekin sortu da: ez da esperientziak trukatzeko edo gogoeta akademikorako soilik erabiltzen den biltzar bat, baizik eta harrera eta integrazio-prozesuak hobetzen lagunduko duten proposamen zehatzak egiteko lan-espazio bat.
«Harrera lurraldean eraikitzen da, baina hura baldintzatzen duten esparru juridikoak gero eta gehiago erabakitzen dira espainiar estatuko eta Europako esparruetan. Euskadik aktiboki parte hartu nahi du eztabaida horretan, esperientzia, ezagutza eta proposamenak eskainiz» azaldu du Nerea Melgosa sailburuak. Ongizate, Gazteria eta Erronka Demografiko Saileko ordezkari nagusiaren hitzetan, nazioarteko kongresu honen helburua Eusko Jaurlaritzak administrazio eta organo eskudunei helaraziko dizkien proposamen zehatzak sortzea da, erakundeen, profesionalen, unibertsitateen, elkarteen eta hiritargo orokorraren arteko lan partekatuaren bidez.
Biltzarra migrazio-politiketarako garrantzi berezia duen une batean egingo da. Araudi eta erakunde-aldaketa sakonen testuingurua osatzen dute Atzerritarrei buruzko Erregelamendu berriaren aplikazioak, Migrazio eta Asilorako Europako Ituna indarrean jartzeak eta duela gutxi egindako pertsona atzerritarren ez-ohiko erregularizazio-prozesuetatik eratorritako agertoki berri bat irekitzeak. Esparru juridiko berri horiek interpretatzeko eta aplikatzeko moduak eragin zuzena izango du datozen urteetan migratzaileen harrera, inklusio eta integrazio-prozesuetan, eta beharrezkoa izango da analisirako, elkarrizketarako eta erantzunak kolektiboki eraikitzeko espazio bat. Biltzarrak iraungo duen bi egunetan, bertaratuko denak hitzaldiak, tailerrak eta jardunbide egokien erakustaldiak topatuko ditu eta hainbat erronka aztertuko dira, hala nola prestakuntza eta enplegua, atzerritartasunari dagokion araudia, berme juridikoak eta giza-eskubideak, genero-ikuspegia…
Datozen hilabeteetan jakinaraziko dira Kongresuaren behin betiko programa, parte hartuko duten hizlariak, lan-espazioak eta izena emateko prozedura. Une honetatik aurrera, Eusko Jaurlaritzak harrera eta integrazio prozesuetan inplikatutako erakunde, elkarte, unibertsitate, profesional eta eragileak gonbidatzen ditu Euskadi migrazio erronka berrien aurrean hausnarketa, lankidetza eta proposamen gune bihurtu nahi duen topaketa honetan parte hartzera.
