- Eragiketa Euskadi Eraldatuz 2030 Planaren eta Euskadi 2030 Industria Planaren barruan kokatzen da, eta Enagás konpainiak hidrogeno berdeko eta CO2-ko azpiegitura energetikoen garapenean duen izaera estrategikoari erantzuten dio, industriaren deskarbonizazioaren alde.
- Euskadi erreferentzia bihurtzen du hidrogeno berde iberikoaren eta CO2-aren garraioan, erregai berriztagarrien garapenean eta energiaren arloko balio-kate berrien sorreran.
Eusko Jaurlaritzak, Finantzen Euskal Institutuaren (FEI) bidez, Enagás konpainiaren kapital sozialaren % 1 erosi du. Eragiketa hori Indartuz sozietatearen bidez gauzatu da, hau da, Euskadi Eraldatuz 2030 Planaren esparruan bultzatutako finantza-tresnaren bidez. Erosketa hori tresna eraldatzaile horren lehen inbertsio zuzena da, eta inbertsio estrategikoa da energia-autonomian eta energia-horniduraren segurtasunean funtsezko aktibo batean.
Enagás konpainiak azpiegitura kritikoa du energia-sistemaren funtzionamendurako eta Euskadin energia-hornidura bermatzeko. Haren zeregina are garrantzitsuagoa da energia-eredua eraldatzen ari den testuinguruan. Izatez, testuinguru horretan, konpainiak funtsezko zeregina bete behar du hidrogeno berdearen sare nagusiaren hedapenean eta Europako H2Med korridorean (Iberiar Penintsulako hidrogenoaren garraio-sarea eta Europako ipar-mendebaldekoa konektatzea ahalbidetuko duen Europa barruko ekimena).
Enagás eta Eusko Jaurlaritza dira, elkarrekin, “Hub COnet2” proiektuaren buru. Proiektu hori funtsezkoa izango da erortzen zailak diren industria-sektoreen deskarbonizazioan laguntzeko, CO2-a murrizteko Europako helburuen ildotik. Hidrogeno berdearen sare nagusia eta “Hub COnet2” proiektua Europako Interes Komuneko Proiektuak dira.
Eragiketa Euskadi Eraldatuz 2030 Planaren eta Euskadi 2030 Industria Planaren estrategiaren barruan sartzen da, eta ekonomia, industria eta lurraldea eraldatzeko ahalmena duten etorkizuneko azpiegiturak garatzea du xede. Kasu honetan, inbertsioak logika bikoitza du: batetik, Euskadiren autonomia eta segurtasun energetikoa indartzen ditu, jada funtsezkoak diren aktiboen bitartez; eta, bestetik, Euskadi posizio nabarmenean kokatzen du hidrogeno berde iberikoaren eta CO2-aren garraioan, erregai berriztagarrien garapenean eta energiaren arloko balio-kate berrien sorreran.
Hidrogenoaren korridorea eta CO2-arekin lotzen diren deskarbonizazio-proiektuak
Euskadi hidrogeno berdearen garraio-sare nagusiaren funtsezko nodoa izango da —163 kilometroko azpiegitura aurreikusten da—, betiere CO2-aren eta lehendik dauden energia-aktiboen birmoldaketaren arloko deskarbonizazio-proiektuekin batera. Hain zuzen, eragiketa horren bidez, zirkulazio hori lagundu eta bizkortu nahi da, lehendik ezarrita dauden industria-ahalmenak baliatuta eta ingurumen-inpaktuak minimizatuta, egungo trazadurak berrerabiltzeari esker.
Ikuspegi ekonomikotik, Enagás konpainiak aktibo solido baten baldintzak betetzen ditu, diru-sarrera arautuak baititu eta gas-jarduera tradizionaletik hidrogeno berderako trantsizioranzko bide-orri argia baitu. Konpainiaren 2025-2030 plan estrategikoak inbertsio garrantzitsuak aurreikusten ditu, bereziki hidrogeno berdean eta energia-azpiegitura berrietan; izatez, inbertsio horien bitartez, hazkundera begira egokitu nahi du, betiere egungo energia-sektorearen jarduera eta bide jasangarriagoranzko aldaketarako testuinguruan.
Testuinguru horretan, sozietatearen % 1 erostea aktibo estrategikoa da Euskadiren energia-autonomia bultzatzeko, gure industriaren deskarbonizazioa sustatzeko eta energiaren arloko balio-kate berriak sortzeko (erregai berriztagarriak, adibidez). Parte-hartzea oraingo eta etorkizuneko azpiegitura baten aldeko apustua da; deskarbonizazioaren eta trantsizio energetikoaren aldeko apustua da, hau da, gasetik molekula berriztagarrietarako trantsizioaren bultzada; industria-lehiakortasuna indartzearen aldeko apustua, energia-iturriak egokituta; eta Euskadin arlo horretako aukera teknologiko berriak ezartzen laguntzeko apustua.
Euskadi Eraldatuz 2030
Inbertsio hori Euskadi Eraldatuz 2030 estrategiaren barruan sartzen da, hau da, Eusko Jaurlaritzak Euskal Finantza Aliantzaren esparruan konprometitutako eta Finantzen Euskal Institutuak kudeatutako 1.000 milioi euroko ekarpenaren Inbertsio Eraldatzaileen Planaren barruan.
Orain arte, Planaren zenbait mugarri aktibatu dira. Finkatuz sozietatea —trakzio-enpresak errotzeko tresna— indartu eta egokitu da, eta duela gutxi erreferentziazko inbertsioak egin ditu, hala nola Ayesa edo Talgo enpresetan. Era berean, inbertsio eraldatzaile handietarako Indartuz sozietatea sortu da, eta horrek Enagás konpainiaren % 1eko partaidetza eskuratu du. Gainera, eskalagarritasunaren arloko inbertsio-programaren lehen deialdia ere egin du eta Oquendo Capital enpresari berriki adjudikatu zaion zor malguaren programarako kudeatzailea hautatzeko prozesua ere abiarazi du.
Euskadi 2030 Industria Plana: abian diren proiektu eraldatzaileak
Hidrogeno berdearen eta erregai berriztagarrien garapenaren aldeko apustua estrategikoa da Euskadi 2030 Industria Planean, eta, horretarako, proiektu eraldatzaileak bultzatzen dira eta horietan parte hartzen da, hala nola Deskarbonizazioaren Harana eta Erregai Berriztagarrien Huba.
Deskarbonizazioaren Haranaren proiektuari esker, Euskadi trantsizio energetikoan erreferente izango da, eta, hala, inbertsioak erakarriko ditu, berrikuntza sustatuko du eta Hidrogenoaren eta Erregai Berriztagarrien inguruko balio erantsi handiko sektoreetan enplegu-aukera berriak sortuko ditu.
Erregai Berriztagarrien Hubaren proiektu eraldatzailea 2026ko apirilean abiatu zen, eta Euskadi Europako abangoardian kokatuko du erregai berriztagarrien garapen teknologikoaren eta industrialaren arloan. Energy Intelligence Center (EIC) proiektua oinarri duen Hub horrek artikulatuko ditu Euskadik erregai berriztagarrien garapena bultzatzeko dituen gaitasun teknologikoak, industrialak eta zientifikoak. Erregai sintetikoaren, bioerregai aurreratuen, CO₂-arekin lotutako teknologien eta hidrogeno berdearen arloko funtsezko teknologiak garatu eta ezarriko dira.
