Ekonomia, Lan eta Enplegu Sailak 129.000 euro baino gehiago bideratuko ditu inklusioko hamahiru ekimen komunitario bultzatzera

• Euskadiko udalerri eta auzoetan koordinazioa, gizarteratze eta laneratzea eta erantzun komunitarioak indartzeko bost udalek eta zortzi gizarte erakundek sustatutako proiektuak finantzatuko dituzte laguntzek

Ekonomia, Lan eta Enplegu Sailak, Mikel Torres Lehendakariordeak proposatuta, 129.370 euro zuzenean ematea onartu du astearte honetan, bost erakunde publikori eta irabazi asmorik gabeko zortzi erakunde pribaturi, Inklusio Mahaien esparruan autogestionatutako hamahiru ekimen komunitario garatzeko. Ekimen horien helburua da herritarrak pobrezia, bazterketa eta desberdintasun egoeren aurrean sentsibilizatzen laguntzea.

Erakunde publiko onuradunek 49.420 euro jasoko dituzte guztira. Horiekin, inklusio ekosistemaren lankidetza mapa egingo du Amurrioko Udalak; gizarteratzeko eta laneratzeko ibilbideen eta baliabideen mapa bat garatuko du Eibarko Udalak; “Aniztasunean Elkarrekin” bigarren jardunaldi inklusiboa egingo du Lasarte-Oriak; mugikortasunari eta inklusioari buruzko diagnostiko bat egingo du Oionek Arabako Errioxan; eta jardunaldi komunitario bat antolatuko du Zumarragak film labur bat sortzearekin batera.

Bestalde, irabazi asmorik gabeko zortzi erakunde pribatuek 79.950 euro jasoko dituzte. Tendel elkarteak ekimen bat bultzatuko du Otxarkoagako baliabideen maparako sarbide inklusiboa errazteko; “Auzoko plazak-Espacios de barrio” garatuko du Begirune Fundazioak; Santurtziko baliabideen ekosisteman lan egingo du Bilboko Elizbarrutiko Caritasek; eta SareLab jarriko du abian Emaus Bilbao SCISek, faktore anitzeko arretarako tresna digitala.

Era berean, Emaus Gizarte Fundazioak “Irun inklusiboa” proiektua garatuko du; “Kulturak konektatuz” sustatuko du Sortarazik Leioan; Troconiz Santacoloma Fundazioak Portugaleten jarraituko du «Lotura Bidea II. Raíces y Alas «; eta Zabaltzen Sartu Koopek egoera ahulean dauden pertsonentzako etxebizitzaren arloko alternatibak jorratuko ditu Durangoko Inklusio Mahaitik.

Proiektu horien artean daude diagnostikoak, baliabideen mapak, tresna digitalak, jardunaldi komunitarioak eta bizikidetzarekin, cultura aniztasunarekin, etxebizitzarekin eta gizarteratzearekin eta laneratzearekin lotutako ekimenak. Horrela, laguntzek aukera emango dute esku hartzea lurralde bakoitzaren ezaugarri eta beharrizan zehatzetara egokitzeko.

Jarduera horiek Inklusiorako II. Plan Operatiboan (2025-2026) sartzen dira, eta enplegu sistema publikoen, gizarte zerbitzuen, hezkuntzaren, osasunaren eta etxebizitzaren arteko koordinazioa indartu nahi dute, baita hirugarren sektoreko erakundeekin duten lankidetza ere. Inklusio Mahaiak lan partekaturako guneak dira, eta herritarren arreta hobetzera, funtsezko baliabideetarako sarbide zuzena bultzatzera eta esku hartze sozialaren dimentsio komunitarioa indartzera daude bideratuta.

Ekimenak jarraipena ematen dio mahai horiek birdefinitzeko prozesuari, Eusko Jaurlaritzako Inklusio Zuzendaritzak 2025ean eta 2026an bultzatutakoa, gobernantza eredu berri baten diseinuan eta pilotajean oinarrituta. Helburua da egitura zabalagoetan integratzea, funtzionamendu eraginkorragoa ematea eta emaitza zehatzetara bideratutako lankidetzarantz aurrera egitea. Jarduerak 2026ko abenduaren 31ra arte garatu ahal izango dira.

Laguntza horien bidez, Ekonomia, Lan eta Enplegu Sailak Inklusio Mahaiak indartu ditu, erakundeen arteko koordinaziorako eta esperimentazio komunitariorako gune gisa, eta, aldi berean, sendotu, lurralde errealitate desberdinetara egokitu eta datozen urteetan zabaldu daitekeen eredu bat bultzatu du.