Gaurko Gobernu Kontseiluan 2026-2030 aldirako III. Ekintza Plan Operatiboa onartu da. Plan honek jarraipena emango dio Eusko Jaurlaritzaren estrategiari, emakumeen eta gizonen arteko soldata arrakalaren murrizketan aurrera egiteko eta hura sortzen duten egiturazko kausetan jarduteko.
Mikel Torres, Lehendakariordeak eta Ekonomia, Lan eta Enplegu sailburuak aurkeztutako III. Planaren helburua da lortutako aurrerapenak sendotzea eta aldaketa estruktural eta iraunkor bihurtzea. Lehentasunen artean, honako hauek nabarmentzen dira: soldata arrakala murriztea, ordainsarien gardentasuna hedatzea, kontziliazioa eta erantzukidetasuna bultzatzea, hezkuntza eta lanbide segregazioa murriztea eta berdintasunaren arloko sentsibilizazioa eta konpromiso soziala indartzea.
Plan berriak 91 neurri biltzen ditu, lau ardatz estrategikoren eta hogei gidalerroren inguruan antolatuak, euskal administrazioko sail, erakunde autonomo eta erakunde publiko guztien partehartzearekin.
Era berean, Eusko Jaurlaritzako Ekonomia, Lan eta Enplegu Sailak, Emakunde-Emakumearen Euskal Erakundearen laguntzarekin, Soldata Arrakalari buruzko Nazioarteko V. Biltzarra antolatuko du datorren asteazkenean, irailak 23.
Topaketa honetan erakundeetako ordezkariak eta adituak bilduko dira, emakumeen eta gizonen arteko soldata berdintasuna lortzeko bidean dauden erronka eta aukera nagusiak aztertzeko. Bosgarren edizio horretan, kongresuak nazioarteko ikuspegia txertatuko du EPICen eskutik –Soldata Berdintasunerako Nazioarteko Koalizioa–. Lanaren Nazioarteko Erakundeak (OIT), NBE Emakumeak eta Ekonomia Lankidetza eta Garapenerako Erakundeak (ELGA) bultzatutako aliantza da EPIC, soldata berdintasuna sustatzeko eta maila globalean ezagutzak, politikak eta jardunbide egokiak partekatzeko lan egiten duena.
«Emakumea Industriara» proiektu eraldatzailea
Gaur ere, argi berdea eman zaio «Emakumea Industriara» proiektu eraldatzaileari. Ekimen horren helburua da emakumeak Euskadiko industria-enpresetako ekoizpen-lanpostuetan txertatzea sustatzea, kontratazio-konpromiso errealekin lotutako prestakuntza-ibilbideen bidez Ekimena SPRIren bidez jarriko da abian.
Proiektu honekin hartutako konpromisoa betetzen da: beste sektore batzuetan lan-esperientzia duten emakumeak industriako ekoizpen-lanpostuetara erakartzea, prestatzea eta bertan txertatzea. Horretarako, honako programa pilotu berri hau jarri du abian, hasiera batean milioi 1 euroko aurrekontuarekin, prestakuntza eta bekak finantzatzeko. Lehen fasean, tokiko 5 eta 7 proiektu artean hautatzea aurreikusten da.
Proiektuaren aurkezpenean, Mikel Jauregi, Industria, Trantsizio Energetiko eta Jasangarritasuneko sailburuak nabarmendu duenez, “industriak kalitatezko enplegua eskaintzen du, eta emakumeen presentzia urria gure herrialdeko lan-arrakalaren faktore nagusietako bat da. Emakumeek industrian duten ordezkaritza urriaren aurka borrokatzea Euskadiko gizonen eta emakumeen arteko ekitatearen alde egitea da”. Hain zuzen ere, honako Proiektu Eraldatzailearen beste helburuetako bat da Euskal industriaren talentu-beharrari erantzutea eta emakumeen parte-hartzea handitzea oraindik ere gutxi ordezkatuta dauden sektore batean. Egun, emakumeek industriako enpleguaren %21,7 baino ez dute ordezkatzen, eta ehuneko hori nabarmen jaisten da lantegietako ekoizpen-lanpostuetan.
Belaunaldien arteko Errelebo eta Ezagutzaren Transmisiorako Plana
Gobernu Kontseiluak erretiro aurreratuari lotutako Belaunaldien arteko Errelebo eta Ezagutzaren Transmisiorako Plana onartu du, ekainean LAB, UGT eta CCOO sindikatuekin lortutako akordioaren ondoren. Gaurko onarpenaren ondotik, baldintzak betetzen dituzten enplegatu publikoak planera atxiki ahal izango dira.
7.000 pertsonatik gorako plantillatik, 63 urtetik gorako 700 langile baino gehiago daude, gaur egun, planera atxiki daitezkeenak eta erretiro aurreratua eskatu.
Maria Ubarretxena bozeramaile eta Gobernantza, Administrazio Digital eta Autogobernuko sailburuak azaldu duenez, “helburua da beren borondatez erretiro aurreratua hartzea aurreikusten duten langileen lan-bizitzaren amaiera antolatzea, zerbitzu publikoaren jarraitutasuna erraztea eta beren lanpostuak betetzean eskuratutako ezagutza erretiroa hartu aurretik identifikatu, dokumentatu eta transmitituko dela bermatzea”.
1,2 milioi euro adikzioen aurkako tokiko proiektuak bultzatzeko
Gobernu Kontseiluak Osasun Sailaren 1.201.328,75 euroko laguntzen agindu bat baimendu du, 2026an Euskadiko Adikzioen VIII. Planarekin bat datozen udal- eta komunitate-programak finantzatzeko.
Helburua da udalerriek prebentzio- eta arreta-politikak herritarrak bizi diren inguruneetara hurbiltzea, sarean lan eginez substantzien eskaintza murrizteko, adikzio-jokabideak prebenitzeko eta estigma murrizteko.
Programa bakoitzaren aurrekontuaren % 50 estaliko dute dirulaguntzek, eta norgehiagoka-erregimenean egingo da deialdia, EHAAn argitaratu eta 15 egun balioduneko epean.
Tokiko eremuan osasuna sustatzeko garatutako partaidetza-proiektuetarako laguntzak
Gobernu Kontseiluak onartutako beste puntu bat osasuna sustatzeko 2026an tokiko eremuan garatutako partaidetza-proiektuak babesteko laguntzak dira, ongizatea hobetzeko, gizarte-kohesioa indartzeko eta osasun-arloko desberdintasunak murrizteko. 250.000 euro bideratuko dira.
Laguntza hauek zuzenean lotuta daude Osasunaren Euskal Itunaren konpromisoekin, herritarrek eta toki-erakundeek osasunaren eta ongizatearen hobekuntzan parte har dezaten bultzatzen baitute. Deialdiak erakundeen eta tokiko komunitatearen arteko baterako lana indartzen du, eta gertuko ekimenak garatzen laguntzen du, udalerri bakoitzaren beharretara egokituta eta osasun-arloko gizarte-desberdintasunak murriztera bideratuta.
481.000 euro Euskadin enplegua eta inklusioa hobetzera bideratutako sei proiektu berritzailetarako laguntzetan
Gobernu Kontseiluak 481.069,19 euroko zuzeneko dirulaguntza onartu du Gobernu Kontseiluan, Berritzelan Sarearekin–Enplegu eta Inklusio Berrikuntzarako Euskal Sarearekin– koordinatuta garatutako sei proiektu eragile finantzatzeko. Deialdi honi esker, enplegagarritasuna hobetzera, inklusioa sustatzera eta euskal lan merkatuaren erronka berriei erantzutera bideratutako proiektu pilotu berritzaileak bultzatuko dira.
129.000 euro baino gehiago inklusioko hamahiru ekimen komunitario bultzatzera
Era berean, 129.370 euro zuzenean ematea onartu du, bost erakunde publikori eta irabazi asmorik gabeko zortzi erakunde pribaturi, Inklusio Mahaien esparruan autogestionatutako hamahiru ekimen komunitario garatzeko. Ekimen horien helburua da herritarrak pobrezia, bazterketa eta desberdintasun egoeren aurrean sentsibilizatzen laguntzea.
Suhiltzaileen promozio berrien prestakuntza praktikoa indartzea
Gobernu Kontseiluak Polizia eta Larrialdietako Euskal Akademiaren eta ERAIKEN Construcción eta MENDIZABALA Lanbide Heziketako ikastetxeen arteko kudeaketa-gomendiorako bi akordio berri baimendu ditu, Euskadiko Suteen Prebentzio eta Itzaltze eta Salbamendu Zerbitzuetako suhiltzaile kategorian sartzeko ikastaroko ikasleen prestakuntzan sakontzeko, bere jarduera profesionalean garatu beharko dituen zereginekin zuzenean lotutako prestakuntza praktiko baten bidez.
ERAIKENek 105 orduko prestakuntza emango du iturgintzan, igeltserotzan eta zurgintzan. Eskolak bertako instalazioetan emango dira, eta gehienez 15.750 euroko finantzaketa izango dute.
Bestalde, MENDIZABALAk 126 orduko prestakuntza eskainiko du elektrizitatean, mekanikan eta metalaren galdaragintzan, baita ibilgailuen mekanika eta elektrizitatean ere. Akordio honetarako aurreikusitako gehieneko ekarpena 18.900 eurokoa da.
Getxo Modaren 39. Edizioa
Getxo Empresarial y Comercial elkarteak antolatutako Getxo Moda edizioa egiteko zuzeneko dirulaguntza onartu du Gobernu Kontseiluak. Proiektuak 55.000 euroko finantzaketa du.
GetxoModa Euskadin finkatuta dagoen moda-lehiaketa bat da, eta, diseinatzaileen, enpresen eta tokiko saltokien sustapenaren bidez, moda erabiltzen du merkataritza dinamizatzeko, talentua bultzatzeko eta Getxoko turismo- eta kultura-proiekziorako tresna gisa.
Jarduera nagusia modako desfileak dira. Horietan, Getxoko saltokiek eta euskal diseinatzaileek parte hartzen dute, eta tokiko merkataritza sustatzeko dimentsio argia dute. Moda erakusleiho gisa erabiltzen dute, parte hartzen duten establezimenduei ikusgarritasuna emateko eta hurbileko merkataritzan kontsumoa sustatzeko.
Berriro 1.5 proiektua: tokiko merkataritzarako fidelizazio-plataforma
Gobernu Kontseiluak Berriro 1.5 proiektua egiteko zuzeneko dirulaguntza onartu du: tokiko merkataritzarako fidelizazio-plataformaren bilakaera. Bizkaidendak elkarteak kudeatzen du proiektua, eta 62.685 euroko finantzaketa du.
2025ean, Berriro proiektua jarri zen abian, tokiko merkataritzarako fidelizazio digital integraleko tresna, fidelizazio-programak modu autonomoan kudeatu ahal izan ditzan, bere behar espezifikoetara egokituz eta merkataritza-inpaktua maximizatuz. 2026aren hasieran, proiektua Arratia-Nerbioi eskualdean eta Durangaldean hedatzen hasi zen, eta, orain, beste urrats bat egin du tresna horren irismena handitzeko. Hala, herritarrentzako goi-mailako pizgarrien plataforma bihurtu du, eta kanpainak segmentatzeko sistema aurreratu bat garatu du.
Ibone Bengoetxearen Parisera bidaia: kultura Euskadiren nazioarteko proiekziorako tresna gisa
Lehenengo lehendakariorde eta Kultura eta Hizkuntza Politikako sailburu Ibone Bengoetxea Parisera joango da irailaren 23an eta 24an, Euskadiren nazioarteko proiekziorako eta aliantza berriak sortzeko tresna gisa kultura ardatz izango duen bidaia instituzionalean.
Agendaren lehen mugarrietako bat, hilaren 23an, Malandain Ballet Biarritz izango da Théâtre des Champs-Élysées zentroan. Bertan, konpainiak bere talde artistiko osoarekin jardungo du lehen aldiz, Parisko musikaren eta dantzaren erreferentziazko agertokietako batean. Konpainiaren presentzia hemen kokatzen da: Ça colle au basque, euskal kulturak eta euskarak eremu frankofonoan duten presentzia indartzeko Etxepare Euskal Institutuaren ekimena.
Hilaren 24an, Parisen aurkeztuko da Eusko Jaurlaritzaren eta Ballet Biarritz Koreografia Zentro Nazionalaren arteko aliantza berria, 2027tik aurrera lankidetza-etapa berri bat irekiko duena. Aliantza hori dantzatik harago joango da, aukera berriak bultzatzeko Euskadiren sorkuntzaren, talentuaren, prestakuntzaren, kulturaren eta nazioarteko proiekzioaren inguruan.
Era berean, lehendakariordearen agendari esker, harremanak estutu ahal izango dira Frantziako kultura-erakundeekin, eta aliantza berriak eraikitzen aurrera egin ahal izango da, Euskadi Globala estrategiaren barruan.
