- Datorren hamarkadako erronka ekonomikoei aurre egiteko, Lehendakariordeak berrikuntzan, inbertsioan eta pertsonetan oinarritutako hazkunde eredua defendatzen du.
Mikel Torres Lehendakariordeak eta Ekonomia, Lan eta Enplegu sailburuak ostegun honetan defendatu duenez, Euskadiren lehiakortasunaren etorkizunak talentua, kalitatezko enplegua eta erakunde, enpresa, unibertsitate eta zentro teknologikoen arteko lankidetza indartzea eskatzen du. KPMG Euskadiren 50. urteurreneko galan, Torresek produktibitatea, berrikuntza eta gizarte-kohesioa uztartzen dituen hazkunde-eredu bat aldarrikatu du, datozen urteetan izango diren eraldaketa teknologiko, energetiko, demografiko eta geopolitikoei segurtasunarekin aurre egiteko.
Lehendakariordeak adierazi duenez, lehiakortasuna da etapa berri honetako erronka ekonomiko nagusia. Azaldu duenez, lehiakortasun hori «balio, produktibitate eta ongizate gehiago sortzeko gaitasun» gisa ulertu behar da.
Torresek defendatu duenez, Euskadik agertoki horri aurre egiteko indar sendoak ditu bere oinarri industrialari, gaitasun berritzaileari, prestakuntza sistemari, enpresen nazioartekotzeari eta trantsizio energetiko eta digitalaren aldeko apustuari esker. Halaber, nazioartean ziurgabetasuna egon arren, euskal ekonomiak kontsumoan, inbertsioan eta enpleguaren sorreran oinarritutako bilakaera positiboa erakusten jarraitzen duela nabarmendu du.
Hala ere, nazioarteko testuinguruaren konplexutasunak euskal ekonomia-sarearen aurre-hartze eta erresilientzia gaitasuna indartzea eskatzen duela ohartarazi du. Zentzu horretan, hornikuntza-kateak indartzea, merkatuak eta hornitzaileak dibertsifikatzea eta ekoizpen-eredu jasangarriagoetarantz aurrera egitea eskatu du. «Nazioarteko irekiera gotorleku bat da, baina erresilienteagoak izatera behartzen gaitu», adierazi du.
Lehendakariordeak inbertsio publiko eta pribatuaren garrantzia ere azpimarratu du, lehiakortasunaren funtsezko motorretako bat baita. «Kapitala mobilizatu, proiektu berriak erakarri eta gure enpresen errotzea indartu behar dugu, inbertsioa, berrikuntza eta enplegua ekuazio beraren parte direlako», esan du. Ildo horretan, Next Generation funts europarren inpaktua nabarmendu du; izan ere, funts horien bitartez 4,3 milioi euro baino gehiago txertatu dira Euskadin, eta, horri esker, euskal BPGa 1,3 puntu handitu da, 10.000 lanpostu sortu dira, eta, horrez gain, inbertsio estrategikoak bizkortu dira, enpresen modernizazioa bultzatuz eta euskal ekonomiaren lehiatzeko gaitasuna indartuz.
Bere diskurtsoaren ardatzetako bat pertsonen papera izan da. Talentua Euskadiko etorkizun ekonomikorako faktore erabakigarria izango dela defendatu du Torresek, eta datorren hamarkadan merkatuak aurre egingo dion belaunaldi-erreleborako prestatzeko beharraz ohartarazi du. «Gaur egun jada ez du zentzurik lehiakortasunaz hitz egiteak pertsonez hitz egin gabe. Ez du zentzurik politika ekonomikoak eta laboralak eta sozialak bereizteak», azpimarratu du. Bere ustez, «kalitatezko enplegua, duina eta segurua, abantaila lehiakorra da eta prestakuntza inbertsio estrategikoa da gure herriarentzat».
Lehendakariordeak nabarmendu duenez lehiakortasunak ere lotura izan behar du eskura dagoen talentu guztiaren inklusioarekin eta aprobetxamenduarekin. «Talentua alferrik galtzen duen, pertsonak atzean uzten dituen edo bere giza potentzialaren zati bati uko egiten dion gizarte bat bere hazkunde ekonomikoaren zati bati ere uko egiten ari zaio», adierazi du.
Torresek, halaber, lankidetzaren garrantzia azpimarratu du, Euskadiren nortasunaren ezaugarrietako bat delako eta etorkizuneko erronkei aurre egiteko ezinbesteko baldintza delako. «Instituzio, enpresa eta erakunde bakar batek ere ezin die aurre egin aurrean ditugun erronkei. Gaitasunak batu, helburuak partekatu eta proiektu komunak eraiki behar ditugu», adierazi du.
Testuinguru horretan, lankidetza-gobernantza baten alde egin du, non erakundeek egonkortasuna eta tresnak emango dituzten, enpresek inbertitzen eta berritzen jarraituko duten, hezkuntza-sistemak ezagutza produkzio-beharretara hurbilduko duen eta finantza-sistemak beharrezko eraldaketak lagunduko dituen.
