• Neurriak ekoizpena egokitzea eta ardoaren merkatuaren antolaketa ahalbidetuko du, eskatutako azalera txikiago baten testuinguruan
• Amaia Barredo: “Deialdi honen fase berri bat itxi eta sektorearekin lanean jarraitzen dugu, plangintza, oreka eta etorkizuneko ikuspegia eskatzen duen egoera bati erantzuna emateko”
Eusko Jaurlaritzako Elikadura, Landa Garapena, Nekazaritza eta Arrantza Sailak 2026ko kanpainarako uzta berdearen laguntzaren eskaerak aurkezteko epea itxi du, guztira 166 espediente erregistratuta, horiek Arabako Errioxan 690 hektareako mahasti-azalera hartzen dutela.
Ardoaren merkatuaren antolaketan eta sektorearen jasangarritasunari laguntzeko ezinbesteko tresna da, ekoizpena egokitzeko aukera ematen baitu, mahats-sortak heltze aurretik kenduz. Neurria Ardoaren Sektoreko Esku-hartzearen (ISV) 2024-2027 esparruan kokatzen da, Nekazaritza Politika Bateratuaren Plan Estrategikoaren barruan.
Kanpaina honetan eskatutako azalera hasieran aurreikusitako bolumenaren azpitik kokatu da, 900 eta 1.000 hektarea artean, baita iazkoaren azpitik ere, orduan 415 eskaera eta 1.340 hektarea erregistratu baitziren. Datu honek kanpainaren bilakaera eta sektorearen erantzuna islatzen ditu egungo testuinguruan.
Hemendik aurrera, Sailak espedienteak berrikusi eta egiaztatzeko fasea hasiko du, ezarritako baldintzak betetzen direla ziurtatzeko eta deialdiko irizpideen arabera ordenatzeko.
“Neurri honek aldez aurretik eta modu antolatuan jarduteko aukera ematen digu, une garrantzitsu batean sektorea lagunduz eta haren egonkortasuna indartuz. Kalitatea, merkatuaren oreka eta gure ustiategien etorkizuna lehenesten dituen eredu baten alde egiten dugu”, azpimarratu du Amaia Barredo sailburuak.
Ebaluazio-fasea amaitutakoan, laguntzak emateko ebazpena aurreikusitako epeetan argitaratuko da. Une horretan, eskatzaileek baimendutako lurzatiak ezagutuko dituzte.
Onuradun diren ustiategiek uzta berdea egin beharko dute, mahats-sortak erabat kenduz, onartutako lurzatietan, 2026ko uztailaren 15a baino lehen. Era berean, jarduketa epe berean egin dutela jakinarazi beharko dute, eta hori laguntzaren ordainketa-eskaeratzat hartuko da.
