Ekonomia, Lan eta Enplegu Sailak 481.000 euro onartu ditu Euskadin enplegua eta inklusioa hobetzera bideratutako sei proiektu berritzailerentzako laguntzetara

• Deialdi horri esker, ekimen aitzindariak garatu ahal izango dira prestakuntzarekin, adimen artifizialarekin, gizarteratzearekin eta laneratzearekin eta talentua erakartzearekin lotuta, eta horien onuradun izango dira Enplegu eta Inklusio Berrikuntzarako Euskal Sareko 22 erakunde

Ekonomia, Lan eta Enplegu Sailak, Mikel Torres Lehendakariordeak proposatuta, 481.069,19 euroko zuzeneko dirulaguntza onartu du Gobernu Kontseiluan, Berritzelan Sarearekin –Enplegu eta Inklusio Berrikuntzarako Euskal Sarearekin– koordinatuta garatutako sei proiektu eragile finantzatzeko. Deialdi horri esker, enplegagarritasuna hobetzera, inklusioa sustatzera eta euskal lan merkatuaren erronka berriei erantzutera bideratutako proiektu pilotu berritzaileak bultzatuko dira.

Ekimen honek, jarduera zehatzak bultzatzeaz gain, ezagutza sortzeko, esku hartzeko modu berriak baliozkotzeko eta euskal enplegu sistemaren bilakaerari laguntzeko tresna estrategiko gisa finkatzen da, eredu eraginkorragoak, inklusiboagoak eta etorkizuneko erronketara egokituak izan daitezen.

Finantzatutako proiektuen artean dago alboko esklerosi amiotrofikoa duten pertsonei arreta emateko zaintzaile profesionalentzako lehen prestakuntza espezialitate espezializatua garatzea. Era berean, berriki erregularizatutako migratzaileen gizarteratzea eta laneratzea bultzatzeko ekimen bat ere badago; baztertuta geratzeko arriskuan dauden pertsonentzako enplegu ibilbide pertsonalizatuen diseinuan adimen artifiziala aplikatzeko proiektua; eta eskura dagoen talentuaren eta enpresen beharren arteko lotura indartzera bideratutako jarduera bat.

Sei proiektu horiek Enplegu eta Inklusio Sailburuordetzak hautatu ditu lerrokatze estrategikoko, eragin potentzialeko, berrikuntza metodologikoko, bideragarritasun teknikoko eta transferentzia gaitasuneko irizpideak kontuan hartuta, eta 22 erakunde onuradun mobilizatuko dituzte, guztira. Aurtengo abenduaren 31 baino lehen gauzatu beharko dira.

Sareko lana

Proiektuak garatzeko, sarean lan egiteko formulak erabiliko dira, eta, horien bidez, erakunde liderrek, koliteratuek eta laguntzaileek parte hartuko dute, gobernantza partekatuko eredu bat eratuz. Eredu horrek aukera ematen du proiektuak modu koordinatuan gauzatzeko, erantzukizunak behar bezala banatzeko eta baliabide finantzarioak, teknikoak eta giza baliabideak optimizatzeko. Egungo lan merkatuaren erronkei modu integralean heltzeko beharrari erantzuten dio lankidetza ikuspegi horrek.

Adimen artifizialaren erabilera

Adimen artifizialeko sistemak dituzten proiektuei, aldez aurretik, arriskuen ebaluazioa egin beharko zaie, eta Eusko Jaurlaritzak ezarritako gobernantza, etika, segurtasun, gardentasun eta gainbegiratze irizpideekin bat datozela egiaztatu. Gainera, erakunde onuradunek bermatu beharko dute AAri, datuen babesari, zibersegurtasunari eta oinarrizko eskubideei buruz indarrean dagoen araudia betetzen dela; izan ere, edozein ez betetzek laguntza osorik edo zati batean baliogabetzea edo itzultzea ekar dezake.