- eLankidetza – Lankidetzarako eta Elkartasunerako Euskal Agentziak eta Bilboko Udalak antolatutako jardunaldiak urriaren 5ean eta 6an egingo dira Bilbon, nazioarteko adituak, aktibistak eta erakundeetako ordezkariak bilduz.
- ‘Eskubideen aurkako olatu atzerakoiaren aurrean: erresistentzia feministak’ lelopean, autoritarismoaren gorakadak emakumeen eta sexu-genero disidentzien eskubideetan dituen ondorioak eta horiei aurre egiteko estrategia feministak aztertuko dira.
eLankidetza – Lankidetzarako eta Elkartasunerako Euskal Agentziak eta Bilboko Udalak Garapenerako Estrategia Positiboen XV. Jardunaldiak antolatu dituzte. ‘Eskubideen aurkako olatu atzerakoiaren aurrean: erresistentzia feministak’ izenburupean. Urriaren 5ean eta 6an egingo dira jardunaldiok Bilboko Bizkaia Aretoan, mundu osoko adituak, aktibistak, erakundeetako ordezkariak eta gizarte-eragileak bilduz.
Aurtengo edizioak arreta berezia jarriko du mundu mailan indartzen ari diren joera autoritarioetan eta horiek emakumeen nahiz sexu eta genero disidentzien eskubideetan duten eraginean. Eskubideen aurkako diskurtsoen eta politiken gorakadaren aurrean, mugimendu feministek eta gizarte-eragileek eraikitzen ari diren erresistentzia kolektiboak, aliantzak eta alternatibak izango dira hausnarketaren ardatz nagusiak.
Testuinguru horretan, jardunaldiek aztergai izango dituzte azken urteetan hainbat herrialdetan ikusgarri bihurtu diren fenomenoak, hala nola genero-berdintasunaren aurkako diskurtsoak, politika publikoetan izandako atzerapausoak, gorroto-diskurtsoen hedapena edota espazio demokratikoen murrizketa. Aldi berean, eskubideak defendatzeko eta justizia sozialaren alde egiteko garatzen ari diren estrategia feministak ere ezagutaraziko dira.
Bi egunetan zehar, mahai-inguruak eta tailerrak egingo dira. Horien bidez, parte-hartzaileek nazioarteko esperientziak, ikerketak eta praktika eraldatzaileak partekatuko dituzte. Jardunaldiek elkargune izan nahi dute garapenaren, giza eskubideen eta justizia globalaren alde lanean ari diren pertsona eta erakundeentzat, ikaskuntza kolektiboa eta aliantzak sustatzeko asmoz.
Antolatzaileen hitzetan, «eskubideen aurkako joerak gero eta presenteago dauden testuinguru honetan, funtsezkoa da mugimendu feministek eta gizarte-eragileek eraikitzen dituzten erresistentzia eta proposamenak ezagutzea, haiengandik ikastea eta aliantza berriak sendotzea. Jardunaldi hauek hausnarketarako eta ekintza kolektiborako espazio garrantzitsua dira».
Urriaren 5ean egingo den inaugurazio saioan, generoaren aurkako diskurtso eta praktiken nahiz korronte antidemokratikoen aurrerapenari eta eraginei buruzko nazioarteko azterketa konparatua aurkeztuko da. Hurrengo egunean, besteak beste, ‘Ekintza politiko feminista eskubideen atzerakadaren eta generoaren aurkako diskurtsoen aurrean’ eta ‘Erresistentzia feministak berrarmatze- eta bizitzaren militarizazio-garaian’ izeneko solasaldiak egingo dira.
Era berean, hainbat tailer praktiko antolatu dira eskubideen aurkako diskurtsoei aurre egiteko estrategiak lantzeko, gorroto arrazistaren aurrean tresnak partekatzeko eta narratiba feministak zein ekintza digitalerako komunikazio-estrategiak sakontzeko. Egitaraua eskuragarri dago.
Garapenerako Estrategia Positiboen jardunaldiak
eLankidetzak eta Bilboko Udalak 2005ean abiatu zituzten Garapenerako Estrategia Positiboen jardunaldiak. Helburua da garapenerako lankidetzaren, feminismoaren eta gizarte-eraldaketaren arloan lanean ari diren erakunde, kolektibo eta pertsonen arteko topagune egonkorra eskaintzea, Hegoaldeko eta Iparraldeko esperientzien arteko ikaskuntza sustatzeko.
Urte hauetan zehar, Hegoaldeko erakundeek, erakunde publikoek, emakumeen eta mugimendu feministen erakundeek genero-ikuspegia txertatzen duten esperientziak partekatu dituzte, besteak beste, tokiko parte-hartzearen, ekonomiaren, elikadura-burujabetzaren, emakumeen aurkako indarkeriaren, sexu eta ugalketa eskubideen, migrazioen, bakearen eraikuntzaren, jasangarritasunaren, sexu eta genero-aniztasunaren eta giza eskubideen defentsaren esparruetan.
Jardunaldien hamabosgarren edizio honetan ere, esperientzien trukea, hausnarketa kritikoa eta elkarlaneko sareak indartzea izango dira helburu nagusiak, eskubideen defentsan eta justizia globalean oinarritutako gizarte bidezkoagoak eraikitzen laguntzeko.
