Andoni Martínez Barañano tenorrak, konfinamenduan zehar Algortako San Nikolas plazako auzotarrak animatu zituenak Cáritas Bizkaiaren aldeko dirua bilduko du “Desde mi balcón a tu corazón” disko solidarioaren bitartez. Getxoko Muxikebarri zentroan aurkeztu du gaur bertan abeslariak diskoa, Mario Lerena piano-jotzaile getxotarrarekin elkarlanean grabatutakoa eta horretan berrogeialdian interpretatu zituen zenbait kanta bildu ditu. Diskoa gaur hasita eros daiteke www.andonitenor.com webgunean eta bildutako dirua Covid-19ren eraginez gizarte bazterketa-arriskuan dauden emakumeei laguntzeko erabiliko da.
Guztira, diskoan 12 pieza bildu dira, arrakasta gehien izan zutenak. Horietako bat “O sole mio” abeslari napolitar ezaguna da. Horrekin, Martínez Barañanok berrogeialdian zehar egunero balkoira kantatzera ateratzeko konpromisoa hartu zuen. Horren ondoren opera, zartzuela, boleroak eta herri kantak etorri ziren egunez egun saio solidario horietan, sare sozialen bitartez zabaldu zituenak. Diskoaren gainerako kantak opera-ariak, euskal kantak, espainiar abestiak eta napolitarrak dira. Horien artean, honako kanta ospetsu hauek aipatu behar dira: “Turandot” operaren “Nessun dorma”, Mikel Laboaren “Txoria Txori”, “Maitetxu mía” zortzikoa eta “Core’ngrato” napolitar abestia.
