Barakaldoko Udal Musika Bandak hilabete honetan abiaraziko du musika denboraldi berria. Hemendik eta urtarrilera arte hiru ikuskizun antolatu dira Barakaldo Antzokian, eta bertan neurriak hartu dira emanaldiak segurtasun-berme handienekin egin daitezen. Urriaren 30ean izango da ikusleentzako lehen hitzordua, Tarde de Western ikuskizunarekin. «Zalantzarik gabe, eskerrak eman nahi dizkiogu Udal Musika Bandari, herritarrak Covid-19etik babesteko hartu diren beharrezko neurrietara egokitu izanagatik, eta pandemia gorabehera musikaz gozatzen jarraitzeko aukera emateagatik», eskertu du Kulturako zinegotzi Nerea Canterok Udal Musika Bandaren zuzendari Alberto García Espinarekin batera.
The Western Mendebaldeko Zinema izan zen musikak garrantzi handia izan zuen zinema-genero bat. Konpositore handi askok genero horren inguruan ekin zioten beren ibilbideari, duela gutxi hildako italiar maisu bikain Ennio Morriconek esaterako. Kontzertu horretan, Udal Musika Bandak orri enblematikoenetako batzuk gogoraraziko ditu. Beste egile ospetsu batzuek ere izan zuten arrakasta genero horretan, Elmer Bernsteinek esaterako, The Magnificent Seven filmerako egin zuen musikari esker.
Azaroaren 27an, BMBk Santa Zeziliako kontzertua emango du: El abrazo de la ciudad sonora. «Barakaldon, taupada-hotsak eta orroak entzuten ditugu esnatzean, eta entzumenari kasu egiten badiogu, haren soinuek besarkatu eta bildu egiten gaituzte, bai eta gure bizitzak urrumatzen ere. Izpiritu berari jarraiki, pieza inspiratzaileak aletuko ditu kontzertuak, eta horietatik abiatuko gara hiriaren gaindi hegan egiteko, hirian murgiltzeko eta haren besarkadarekin bat egiteko, Mikel Alvira idazleak horretarako propio presatutako testu argitaragabeak lagundurik» azaldu du García Espinak.
Urtarrilaren 4a izango da Urte Berriko kontzertu herrikoi eta arrakastatsuaren eguna. BMBk 2021. urteari emango dio ongietorria, eta denboraldi berria aurkeztuko du musika maite duten guztientzako nahitaezko hitzorduan. «Ikusten duzuen bezala, denboraldi eta programazio oso erakargarriak ditugu urteko azken hiruhileko hau ixteko», esan du amaitzeko.
