- Euskadik hizlari nagusi gisa parte hartu du Europako Batzordeak bultzatutako Cross-Border Data Collection proiektu europarraren amaieran
- Eusko Jaurlaritzak mugako eskualdeek eta Estaturik gabeko nazioen inplikazio handiagoa defendatzen du Schengen eremuaren etorkizunari buruzko eztabaidan
- Gaur egun Euskadi buru duen Akitania Berria Euskadi Nafarroa euroeskualdeak Europako EGTC Award 2026 saria jaso du, Enplegu Egunak ekimena garatzeagatik
Eusko Jaurlaritzak European Cross-Border Platform (ECBP) erakundearen urteko bileran parte hartu du aste honetan Bruselan. European Cross-Border Platform mugako eskualdeen, euroeskualdeen eta lurralde-lankidetzako Europako taldeen arteko trukerako Europako gune nagusia da. Euskal presentziak paper nabarmena izan du topaketan zehar egindako bi eztabaida estrategikotan. Alde batetik, Euskadik, Europako Batzordeak gonbidatuta, keynote speaker gisa parte hartu zuen Cross-Border Data Collection proiektuaren amaierako konferentzian. Eskualde Politikako Zuzendaritza Nagusiak (REGIO ZG) bultzatutako ekimena da, eta Europar Batasunean mugaz gaindiko datu estatistikoen bilketa eta erabilera hobetzea du helburu.
Bere hitzaldian, Eusko Jaurlaritzak Akitania Berria Euskadi Nafarroa euroeskualdearen eta LANEAN bezalako proiektuen esperientzia balioetsi zuen, eta informazio alderagarria eta eguneratua izateko beharra azpimarratu zuen, mugaz gaindiko lan mugikortasuna bezalako fenomenoak ulertzeko eta politika publiko eraginkorrak diseinatzeko, hala nola enpleguan, garraioan, prestakuntzan edo lurralde plangintzan.
Euskadik defendatu zuen, halaber, mugako eskualdeek eta estaturik gabeko nazioek ezin dutela “puntu itsu estatistiko” izaten jarraitu, eta Europako, nazioko eta eskualdeko informazio-sistemen arteko koordinazio handiagoa eskatu zuen, ebidentzietan oinarritutako benetako gobernantza lortzeko.
Schengen Eremuaren etorkizunari buruzko eztabaida
Era berean, Eusko Jaurlaritzak Schengen Eremuko mugako lurraldeen etorkizunari buruzko mahai-inguruan parte hartu zuen, Europako Batzordeko, Frantziako Barne Ministerioko, Eskualdeen Europako Batzordeko eta hainbat ikerketa-zentro espezializatutako ordezkariekin batera.
Eztabaidan, Euskadik gogorarazi zuen muga bizitza partekatuko espazio bat dela, milaka pertsonak egunero gurutzatzen dutena, lan egiteko, ikasteko edo hainbat zerbitzu eskuratzeko, besteak beste. Testuinguru horretan, defendatu zuen mugako kudeaketa-politikek behar bezala konbinatu behar direla segurtasun-eskakizunak eta zirkulazio askea zaintzea, eta kontuan hartu behar dela neurri jakin batzuek herritarrengan, jarduera ekonomikoan eta lurralde-lankidetzan izan dezaketen eragina.
Eusko Jaurlaritzak, gainera, maila anitzeko gobernantza indartzeko beharra azpimarratu zuen, mugako eskualdeetan, toki-erakundeetan eta lurralde-lankidetzako egituretan modu aktiboagoan txertatuz lurralde horiei zuzenean eragiten dieten Europako politikak diseinatu, aplikatu eta ebaluatzeko orduan.
Europaren aitorpena NAEN Euroeskualdeari
Gainera, Europako Eskualdeen Batzordeak antolatutako EGTC Award 2026 Building Europe Across Borders sariak banatu ziren Bruselan. Edizio honetan, Akitania Berria Euskadi Nafarroa Euroeskualdea, gaur egun Eusko Jaurlaritza buru duena, Enplegu Egunak ekimenagatik nabarmendu zen, mugaz bi aldeen arteko mugaz gaindiko lan-mugikortasuna sustatzera eta enplegua lortzea erraztera bideratutako dispositibo berritzailea.
Europako aitorpen horrek Euroeskualdeak herritarrei lan aukerak hurbiltzeko, mugaz gaindiko lan merkatuaren integrazioa indartzeko eta euroeskualdeko lurraldean aukera espazio komun bat eraikitzen laguntzeko egindako lana balioesten du.
European Cross-Border Platform erakundean parte hartuz, Eusko Jaurlaritzak Europa kohesionatuago batekiko konpromisoa berretsi du, lurralde-lankidetzan, zirkulazio askean eta eskualdeen parte-hartze aktiboan oinarrituta Europako proiektuaren eraikuntzan.
