- Mikel Torres Lehendakariordeak zuzendutako sailak bi laguntza deialdi onartu ditu gizarte ekonomian ekiteko, bazkideak sartzeko eta kooperatiben eta lan sozietateen kudeaketa hobetzeko laguntza teknikoaren bidez
Ekonomia, Lan eta Enplegu Sailak, Mikel Torres Lehendakariordeak proposatuta, Euskadin Gizarte Ekonomiaren ekosistema bultzatzeko dirulaguntzen bi deialdi onartu ditu astearte honetan. Guztira, 4,46 milioi euro bideratuko dira 2026ko ekitaldirako. Laguntza horiek kooperatiba eta lan sozietate berrien sorrera sustatzera eta lehendik daudenen lehiakortasuna eta kudeaketa indartzera zuzenduko dira, laguntza tekniko espezializatuko jardueren bidez.
Deialdi nagusiak 4.025.000 euro ditu, eta helburua da ekintzailetza kolektiboa sustatzea, gizarte ekonomiako enpresa berriak eratzea eta bazkide langileak sartzea. Laguntza horiek hiru eremu handitan egituratzen dira: ideia lehiaketen, preskriptore sareen eta lurralde sustapenerako planen bidez enpresak sortzearen aldeko ekosistema mantentzea; kooperatibak eta lan sozietateak eratzea eta sustatzea; eta bazkide mugagabeak sartzen laguntzea.
Deialdi horren barruan, gizarte ekonomiako enpresa berriak sortzea, erakunde sustatzaileen jarduerak eta bideragarritasun azterlanak babestuko ditu Ekonomia, Lan eta Enplegu Sailak, belaunaldien arteko errelebo prozesuak errazteko edo zailtasunak dituzten enpresak eraldatzeko. Halaber, langabeak, bazkide ez diren langileak, desgaitasuna duten pertsonak eta nekazaritzako elikagaien kooperatibetan sartzen diren ustiategien titularrak bazkide gisa sar daitezen lagunduko du.
Bestalde, Mikel Torres Lehendakariordeak zuzentzen duen sailak 440.000 euro bideratuko ditu gizarte ekonomiako enpresetan laguntza teknikoa emateko deialdira, euskal kooperatiba eta lan sozietateen kudeaketa eta lehiarako gaitasuna hobetzeko. Dirulaguntza horri esker, kudeaketa plan eta aginte taula integralen prestaketa, merkataritza kudeaketako aholkularitza, gerentziaren profesionalizazioa, enpresak suspertzeko planak eta pertsonengan oinarritutako antolaketa eredu berrien ezarpena finantzatuko ditu.
Era berean, eraldaketa digitalarekin eta zibersegurtasunarekin lotutako jarduerak hartzen ditu bere baitan, baita enpresa jardueraren inpaktua murriztera bideratutako ingurumen hobekuntzako proiektuak ere. Gainera, enpresa ekimen berriak errazteko eta gizarte ekonomiari laguntzeko egiturak indartzeko azterlan ekonomiko eta juridikoak jasotzen ditu.
Ekonomia, Lan eta Enplegu Sailak enpresa sare sendoagoa, lehiakorragoa eta lurraldeari errotuagoa bultzatzeko duen estrategiari erantzuten diote bi deialdiek. Eskabideak aurkezteko epea hilabetekoa izango da, aginduak Euskal Herriko Agintaritzaren Aldizkarian argitaratu eta hurrengo egunetik aurrera. Eskabideak Euskadiko Administrazio Publikoaren egoitza elektronikoaren bidez izapidetuko dira.
